KUCHING: Bansa bukai engka semina ngena leka marik Rudraksha ngantaka diri ngambi dipeda bajik memelan enggau nipakka gari dikena, tang bansa Kelabit nyadika leka tu ke dinding bulu lebuh betempuh enggau munsuh kelia.

Ku Roselind Balang, 59 taun, asal ari Bario madahka, ba bansa sida leka tu bisi kuasa nyelai baka tau ajih lalu ulih nyaga tauka nyadika ‘dinding’ tubuh enggau penawar penyakit.

“Leka Rudraksha tu ulih ngasuh kitai kering, regas enggau sikar bejalai ba babas tauka kampung kelebih agi maya bekayau.

“Leka marik tu mega dikena bansa kami berubat chara lama, nyadika sakang seribu guna enggau penawar penyakit ti bisa sereta ngasi amat.

“Bansa Kelabit kelia endang seruran betangkinka leka tu lebuh belaban enggau munsuh laban ulih nyadi ‘dinding’ sereta ngasuh sida kering,” ku iya lebuh dirandau Suara Sarawak.

NGIBUN PESAKA… Roselind Balang mantaika sekeda marik ti dijual iya

Ku iya, pengudah sekeda bansa Kelabit tu megai pengarap Kristian enggau pengarap bukai, leka Rudraksha nyau nadai dikeibuh agi, enda diguna.

“Taja pia, leka marik tu baka nadai beguna agi ba pengidup sida pengudah megai pengarap baru lalu ngelengka pengarap lama.

“Aku meda leka leka tu chukup manah enti ditusuk nyadi marik enggau gelang jari, dia aku lalu teulihka runding sereta nguji nebuk leka lalu ditusuk baka nusuk leka manik bukai nyadi tengak, gelang enggau ke bukai,” ku iya.

Berengkah ari nya, Roselind lalu meransang diri mantaika asil tengkebang marik ari leka Rudraksha ngambi ulih diangkat nyadi sekeda agi kereban penganta nadai milih lelaki enggau indu.

“Aku endang nadai ngadang timbal diterima ari bansa bukai ba dagang marik ditusuk ari leka Rudraksha tu. Chukup laku lalu sida ti meli mega nadai betawar rega.

DINDING BULU… Leka Rudraksha ulih ngasuh tubuh kering, sikar .

“Ati mega ransing agi ngiga enggau nusuk leka marik tu, nguji nipakka iya enggau leka marik bukai ngambika manding agi dipeda,” ku iya lantang.

Kelimpah ditusuk nyadi barang dikena ngantak, leka marik tu mega dipechaya ulih nyaga tubuh kitai maya mindah.

“Dia aku ngasaika dagang tu patut dikerembai nitihka singkang pemansang dunya industri asil pengelandik jari nyelai menua kitai tu.

“Nya alai, aku deka ngerebut sebarang peluang ti bisi disedia piak pengatur dikena ngiri enggau nambahka penemu nentuka asil manik ditengkebang aku manah, manding enggau nangkup peminta industri tu.

“Kelimpah ari nya, aku mega suah ngulu pengawa mandang, ngelaku enggau bejualka asil jari ti ditempa ngena chara lama, penau jari diri empu.

“Aku suah bejalai ngusung palan dagang temuai enggau pesaka bukai beratika guna enggau bansa leka marik ti tau diangkat nyadi asil seni tu.

Pia mega ku iya, ba penemu bansa Kelabit, leka tu bisi ngembuan kuasa ‘magnet’ ti ulih narit pengering orang bukai ngagai orang ti nangkin leka Rudraksha tu.

“Enti tubuh bisi berasai pedis tauka tabin, leka tu mega tau dikirah ngena ai angat lalu ai nya diirup nyadika penawar penyakit ke alai leka nya ulih mali nyadi chura biru.

Ku Roselind, ari pengelandik jari tu niat iya deka mulaika pengingat jema aki ini menya ti pechayaka leka marik tu ulih nyaga tubuh, ke gembar tauka dinding bulu kelebih agi bala bujang berani.

“Aku enggaika pesaka lama bansa Kelabit tu lenyau dibai segang pemansang lalu rebak baru nadai seling penemu pasal iya.

“Ukai semua bansa di dunya tu benasip ngembuan pemeri petara ti nyelai tang peturun bansa Kelabit patut ngetanka iya, anang lalu ngelengka daya idup aki ini menya.

“Taja leka tu diatu digaga nyadi utai dikena ngantaka tubuh tang aku ngarapka nembiak rebak baru ngelala leka tu kelebih agi bansa Kelabit empu,” ku iya andal.