KUCHING: Tiga lelaki enggau siku indu ditan laban ngibun syabu pemerat 6.40 gram ba sebengkah operasyen ngenyit di Kampung Rukam, Jalai Lundu-Biawak Lundu tadi.

Ketuai JSJ Narkotik IPK Sarawak, Superitenden Sahar Abdul Latif madahka operasyen nya belalauka penerang enggau pansik dipejalai kena 1 Ogos tu tadi.

Ku iya, JSJ Narkotik IPK Sarawak dibantu BSJND Lundu udah tetemuka siti paket plastik lutsinar ngundan tujuh paket plastik lutsinar bisi utai beleka kristal dipelaba syabu 4.00 gram pemerat enggau siti paket plastik lutsinar ngundan 16 tiub straw utai beleka syabu seberat 2.40 gram.

Sahar madah, dadah tu ditemu dalam kuchik mua selambar jaket enggau kantung ti ditan ba operasyen nya.

“Siku lelaki, 52 taun, enggau siku indu, 37 taun, disangka ti bisi rekod penyalah lama di baruh Sekysen 12(2) Akta Dadah Berbahaya 1952.

“Ba operasyen ke sama, 11 lelaki enggau siku indu mega ditan laban disangka ngereja penyalah salah guna dadah,” ku iya.

Semua sida ke disangka udah ditan lalu dibai ngagai Opis BSNJD Lundu ngambika pansik silik ulih dipejalai.

Ku iya, asil ai kemi diperesa tetemuka kesemua sida tu positif dadah metamphetamine lalu dipansik di baruh Seksyen 15(1) (a) Akta Dadah Berbahaya 1952.

Sahar madahka Kes dipansik di baruh Seksyen 39A (1) ADB 1952 enggau enti dituku salah tau diukum jil enda kurang dua taun enggau enda lebih lima taun sereta dilunsin enda kurang tiga kali lunsin enggau enda lebih semilan kali lunsin.