“Ambika chunto, orang indu Dayak ulih nambahka penguntung ari pengeraja ti dikemisi diatu baka tanah dalam pengawa betanam betupi.”

KUCHING: Indu di Sarawak nyengkaum bansa Dayak patut berani ngambi bagi dalam pengawa ekonomi ngena teknologi diatu.

Kepala Menteri Datuk Patinggi Abang Johari Tun Openg madah pengawa orang indu ti chakah dalam pengawa nya chukup beguna seriris enggau pelin Perintah Sarawak nyingkang ngagai Industri 4.0.

“Ambika chunto, orang indu Dayak ulih nambahka penguntung ari pengeraja ti dikemisi diatu baka tanah dalam pengawa betanam betupi,” ku iya.

Iya madah munyi nya beserimbai enggau Pengerami Nyain Sempekat Pemereti Ati entara Sarakup Indu Dayak Sarawak (SIDS) enggau Universiti Putra Malaysia (UPM) ditu, kemari.

Datuk Patinggi Abang Johari Tun Openg

Kelimpah ari nya, Abang Johari madah orang indu Dayak ulih ngena pengawa digital dalam produk pesaka asal baka Pua Kumbu.

Ku iya, Pua Kumbu ngembuan rega pesaka tinggi lalu bisi penau ditambah rega ti ulih dipantaika ngagai makit dunya.

Nya alai, iya pechaya enggau kerejasama ari UPM, tu deka mai SIDS meda pengawa kerejasama ti baru ari sukut pansik enggau teknologi ba maya ti deka datai nengah ngena pengeraja ti bisi di Sarawak.

Berebak enggau nya, perintah Sarawak deka meri bantu penyampau RM 5 juta ngagai SIDS numbuhka pengawa pansik ti diberi nama ‘Tan Sri Empiang Jabu Research Chair in Dayak Women Studies’.

Tu entara lain bejalaika pengawa baka dokumen sejarah enggau penatai SIDS, pansik dalam tikas pemansang Dayak ba pengawa politik, ketuai, ekonomi, pelajar enggau ke bukai nyengkaum pemansang tekstil (Pua Kumbu) sereta ngeringka kaban SIDS enggau indu Dayak.

Pansik nya deka dipejalaika UPM nengah Fakulti Ekologi Manusia.