JULUK ati Lady Roberta Simpson, ichit Rajah Vyner Brooke, bejalai nemuai keterubah ke Sarawak nyadi nyata.

Kenu ku Lady Roberta, peluang pemisi di Sarawak nyadi kenang chukup berega ngagai iya.

“Nemuai ke Kuching, Sarawak sereta betemu enggau peranak asal ditu nyadi kenang pemadu manis dalam idup aku.

“Taja tu keterubah aku datai kitu, tang genap peranak ditu kemerah amat, nyau asai udah lama ngelala pangan diri.

“Penyiru enggau pengasih sida ngagai aku endang dikenang aku dataika jemah.

KENANG MANIS…. Ichit Vyner Brooke begambar enggau gambar kenang Charles Brooke.

“Aku ngaku, orang Sarawak chukup kemerah enggau manah basa,” ku iya lebuh aum pemberita di Old Court House, Kuching.

Pia mega ku Lady Roberta, iya tekenyit meda rintai pejalai menyadi iya, Jason Brooke, ungkup aktiviti sida pengelama di Kuching.

“Terubah suba, aku ngasaika rintai pejalai nya kelalu mayuh lalu aku meragam diri enda tetangkup semua aktiviti nya.

“Tang aku nadai ngadang diri ulih ngereja semua aktiviti disediaka Jason enggau ati lantang sereta gagit,” ku iya.

Ku Lady Roberta, penyiru ulah peranak ditu chukup nyelai.

“Sida nerima aku enggau chukup penyiru sereta aku ngasaika penatai diri dibasa lalu semua tu deka semampai dikenang aku.

“Diatu aku udah ulih meretika nama kebuah aki ini suah bekenangka Sarawak.

“Aki enggau ini madahka seduai chukup talukka Sarawak laban sayauka peranak ti kemerah.

Lady Roberta Simpson iya nya anak Elizabeth, uchu Rajah Vyner enggau Ranee Sylvia Brooke.

Entara pemujur dijapai Lady Roberta iya nya ngarang enggau ngeluarka tiga bup lebuh umur manggai 82 taun.

Menyadi lelaki Lady Roberta, Jason Brooke madahka sida udah ngusung sekeda endur ti manah di Kuching ditu.

“Kami udah ngusung Astana, Kampung Budaya di Santubung, Taman Negara Bako enggau ke bukai.

“Kami mega bisi limpang meda bemacham jelu siga baka baya enggau Orang Utan lebuh di Taman Negara Bako.

“Kemisi di Sarawak, kenang chukup berega laban ukai semina ulih ngelala peranak ditu, tang mega ulih meda enggau ngasaika daya idup ti nyelai,” ku iya nerang.

Pengudah kemisi di indu mengeri ditu, Lady Roberta deka nampung pejalai ke Sibu sebedau mulaika diri ke menua asal iya.