SRI AMAN: Siku orang tuai ari Kampung Bakong rugi RM2,000 pengudah ditipu tiga iku orang nyaru diri nyadi pemesai opis pengintu pengelantang.

Penusah tu nyadi urung pukul 10,30 pagi Hari Lima tu tadi pengudah iya ngeluarka duit ari sebuah bank ditu.

Sinu agi meda indai tuai beumur 60 taun nya ukai semina lenyau duit tang ditinggal ba sebuah rumah repuk semak Taman Harmoni.

Kenu ku Pemesai Pemansik Bagi Pansik Penyalah Komersial Indu Opis Polis Pelilih (IPD) Sri Aman, sida enda ngumbai tu kes puchau tang kes orang nyaru diri nyadi pemesai opis pengintu pengelantang.

“Modus operandi nyauka sama enggau sekeda kes sebedau tu ke alai orang rugi ditipu tiga iku ti nyaru diri nyadi pemesai pengintu pengelantang ti ulih mantu ngerumban atur pejalai minta bantu perintah,” ku iya lebuh dirandau Suara Sarawak tadi.

Ku iya, penerang ari indai tuai nya madahka diri terubah dibai saspek ngagai sebuah rumah repuk di Taman Harmoni laban meseti begambar ba rumah nya ngambika dipeda seranta.

“Lebuh begambar, indai tuai nya diasuh ninggalka semua barang berega dalam kerita.

“Taja pia, pengudah iya pansut ari kerita chura kelabu tauka pirak, iya lalu ditinggal pia aja.

“Indai tuai nya sedarka diri ditipu lalu minta bantu orang diau besemak seraya minta anjung ngagai Opis Polis Sri Aman lalu ngaga ripot urung pukul 11:48 pagi,” ku iya nerang silik.

Berindik ari penusah nya, iya ngaku diri lenyau RM2,000 nyengkaum dua bentuk tinchin.

Iya madahka saspek nya indu betubuh perisi, ngena baju panjai bebelang-belang enggau kukut chuk mirah jambu kelimpah dua lelaki duduk ba mua, ke alai siku ngena cheremin mata.

Taja pia, iya enda ngelala bansa kerita enggau chura, sekalika kelabu tauka pirak dikena sida tiga nya.

Polis mansik kes tu di baruh Seksyen 420 Kanun Keseksaan ti ngemai ukum jil abis lama sepuluh taun enggau lunsin sereta tau diukum enti ditemu salah.

Penusah tu nagit orang tuai kelebih agi indu beumur 50 taun enggau tuai agi ti dikumbai nyamai ditipu.

Nya alai polis ngingatka mensia mayuh anang pechayaka sebarang orang kelebih agi orang ti enda dikelala.

Peminta sebarang bantu perintah manah agi terus ngelawa opis bekaul lalu anang bepanggai ba orang sengapa.