SIBU: Tiga pintu peranak Rumah Peter, Skim Skuau di Jalai Ulu Oya, ditu kena tuntung penusah rumah runtuh, kemari.

Pemantu Direktor Operasyen, Opis Bomba enggau Penyah Penusah Malaysia (JBPM) Sarawak Tiong Ling Hii madah penusah tu nyadi ketegal tiang pemun dapur enda ulih ngetanka struktur rumah tiga pintu nya.

“Piak kami nerima ripot jam 9.18 pagi tadi (kemari) ti madahka tiga pintu peranak Rumah Peter iya nya rumah lumur tujuh, lapan enggau semilan runtuh.

“Nitihka Komander Operasyen PBT Mohd Shukri Abdul Rahim rumah panjai tu dientak begantung ari tanah,” ku iya.

Ling Hii bejaku munyi nya ba siti penerang, kemari.

SINU…Gaya penusah ke nuntung peranak Rumah Peter, Skim Skuau di Jalai Ulu Oya, Sibu.

Taja pia, iya madahka nadai bakal tauka bebadi nyawa diripot bekau penusah nya.

“Raban Bomba udah meresa selampur rumah panjai nya lalu ngelalau sida ti nguan rumah nya ngenduh dulu ba bilik besai.

“Pia mega Bomba udah ngenataika pekara tu ngagai ejensi bukai nyengkaum Pemesai Bagi Menua,” ku iya.

Ku iya, sida ti nguan tiga pintu rumah tu iya nya Lintau Renang (tiga iku diri sebilik) ba rumah lumur tujuh, Samai Angkau (semilan iku diri sebilik) rumah lumur lapan enggau Miyah Glayau (11 iku diri sebilik) ba rumah lumur sembilan.

“Semua sida kena penusah tu bisi 23 iku. Sembilan iku ari sida tu anak mit lalu 14 orang besai tuai,” ku iya.

Ling Hii madah ba penusah tu BBP Sungai Merah digerah ngesah sida ngena sebuah FRT, sebuah Hilux lalu dibantu sembilan iku raban ti betuaika PB Mohd Ikmal.

SINU…Gaya penusah ke nuntung peranak Rumah Peter, Skim Skuau di Jalai Ulu Oya, Sibu.