Apai indai nembiak di Kampung Apau Nyaring enggau Long Liaw patut bebendar nyengulaka anak

KUCHING: Komitmen tauka pengeransing apai indai ba Kampung Apau Nyaring enggau Long Liaw ngengulaka anak diri beguna amat.

Kaban Kunsil Nengeri (Adun) Telang Usan Dennis Ngau madah sida enda kala ngelaungka pengelantang pendiau peranak Penan ba kampung nya.

“Bisi tiga buah sekula primari besemak enggau genturung pendiau tu iya nya Sekula Primari (SK) Long Aton, SK Nahah’a enggau SK St. Pius ti ngambi awak urung sejam setengah ngagai dua jam pejalai nyema pulai hari lalu enti sida deka sekula pulai hari endang enda ulih.

“Taja pia, keketiga buah sekula tu bisi palan endur bemalam tauka buding dikena bala nembiak sekula, tang komitmen sekeda apai indai nganjung anak besekula agi kurang,” ku iya.

Dennis bejaku munyi nya lebuh ditelefon Suara Sarawak, ensanus.

Dennis Ngau

Tambah iya, ketegal enggai jauh ari bala anak engka nyadi kebuah apai indai enda nganjung anak sida besekula kelebih agi anak agi mit.

“Endang mayuh anak kampung nya besekula ba tiga buah sekula ti dipadah aku tadi.

“Semina sekeda apai indai ti bedau ngembuan komitmen ngagai pekara pelajar anak sida aja ti enda nganjung anak sida besekula,” ku iya.

Ba pekara kad pengelala iya madah lebih kurang 100 iku peranak kadang kampung nya udah bulih setipikit surat beranak enggau kad pengelala nengah Komiti Khas Peranak Menua ti digaga Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Datuk Sri Fatimah Abdullah.

“Sida ti bedau bulih kad pengelala nya engka laban tinggal tauka nadai diau dia lebuh kami mai Unit Bejalai Opis Pengerejister kia.

“Kitai deka kia baru bulan September tu ila dikena ngemujurka isu kad pengelala sida,” ku iya.

Ba pekara bukai, Dennis madahka sida benung merambu ngaga rumah panjai baru ngagai peranak kampung nya pengudah kereja ngerata tanah.

“Udah tanah dirata kitai deka mantu sida nirika rumah panjai baru enggau perengka pemun baka simen enggau atap ‘spandek’.

“Adun Telang Usan mega deka nerima bekal karan enda lama agi laban Alternative Rural Electrification Scheme (Sares) deka tembu,” ku iya.

Dennis sekali agi madah ka perintah endang seruran mantu enggau nyaga pengelantang pendiau Adun sitak iya taja ngambi awak dikena ngulihka perengkaguna pemun.