“Begunan tu deka terang ari panchar mata panas ti rembus nengah jenila enggau ke bukai.”

KUCHING: Dewan Bandaraya Kuching Utara (DBKU) deka bisi siti Begunan Pintar bepelasarka konsep nyaga rampa menua nyadika opis, ditu.

Datuk Bandar DBKU Datuk Abang Abdul Wahap Abang Julai madahka begunan tu diperambu tembu bulan November tu lalu deka dikena pun bulan Januari 2020.

“Tu deka nyadi sebengkah ari chara dikena ngurangka pengawa ngena kuasa karan ba mengeri tu.

“Begunan tu deka terang ari panchar mata panas ti rembus nengah jenila enggau ke bukai,” ku iya.

KAMI BISI BEGUNAN PINTAR… Datuk Bandar DBKU Datuk Abang Abdul Wahap Abang Julai meri penerang pengudah tembu nyain MoU.

Iya mansutka jaku tu ngagai pemberita pengudah tembu Pengawa Nyain Sempekat Pemereti Ati (MoU) entara DBKU enggau Universiti Malaysia Sarawak (Unimas), Pestech International Bhd, Betsol Sdn Bhd sereta Layar Bumimas Sdn Bhd di Kompleks Islam ditu apin lama ke udah.

Nambahka nya ku iya, begunan tu nadai disediaka suis baka ba jamban.

“Jamban tu deka ngena sensor, lampu deka otomatik pasang enti bisi orang tama kia.

“Teknologi tu penemu ari kompeni ti ngaul kerejasama enggau DBKU ngambi meri servis pintar ngagai komuniti,” ku Abdul Wahap.

Iya mega madahka tu sebagi ari inisiatif ti dipejalai piak DBKU dikena ngintu enggau nyaga rampa menua ungkup rebak dudi.

“Kitai udah nyendiaka begunan pintar lalu dikerapa komuniti kitai mega pintar ngintu enggau nyaga rampa menua sereta perengka guna ba mengeri tu,” ku iya nangkan.

Ba pekara ti sama, Abdul Wahap madahka sida udah ngiga taba nyadi palan muai barang ke enda dikena iya nya Eko-Depo.

“Aku ngarapka komuniti ulih muai semuai barang sida ngagai palan nya lalu deka dikena baru.

“Baka baju ti enda dikena ulih digaga nyadi pua enggau ke bukai,” ku iya.

Pekara tu agi diperambu lalu piak sida nguji ngumpul belanja dikena bejalaika inisiatif tu.

“DBKU nadai ngemanah barang ti udah dikena tang piak sida deka meri barang nya ngagai komuniti ungkup proses dikena baru enggau pekara bukai,” ku iya nambah.