KUCHING: Kongres Serakup Orang Gawa Perintah (Cuepacs) endang bebendar nyaga sereta ngelindung hak kaban sida.

Mandal Presiden Cuepacs Zainal Ismail madah taja bebendar ngering diri sida endang ngena atur ti betul.

“Enti nitih bisi tiga pekara digaga ungkup orang gawa perintah maya bajet 2017/2018 menya baka niki setangga gaji, ubah timpuh niki pangkat enggau ubah ba elaun ungkus pengidup baka elaun kandang menua enggau elaun rumah.

“Taja pia, kitai semina merambu tang petara ngatur laban perintah bekalih maya 9 Mei 2018 ti ngujungka atur bajet 2017/2018 nya tejanggal,” ku iya.

Zainal bejaku munyi nya ba Aum Besai Orang Gawa Perintah PDRM Kontinjen Sarawak enggau Kepala Polis Menua Sarawak di Pustaka ditu, kemari.

Mandal Presiden Cuepacs Zainal Ismail

Ku iya, lebuh perintah udah bekalih sida udah bisi ngatur betemu enggau Menteri Besai Tun Dr. Mahathir Mohamad kena 22 Disember 2018 berandauka pasal nyambung ungkup ti patut diterima orang gawa perintah ti tejanggal nya.

“Taja enda mudah, tang kitai tetap deka nyambung baru pekara ti dipinta maya nya taja bedau bisi pemutus ti nyemetak diatu.

“Bisi sekeda ti bejaku sebubu deka muai orang gawa perintah laban ku sida orang gawa perintah tu kelalu mayuh sereta deka ngemaduka agih pinchin ngujungka mayuh bala tusah ati.

“Dia kami ngaga pansik selampur menua ngagai orang gawa perintah lalu betemu enggau Menteri Besai Tun Dr.

Mahathir Mohamad sekali agi sereta nerang enggau iya nyema orang ti gawa perintah tu dibuai tentu opis perintah deka napi penanggul,” ku iya.

Tandu iya, udah mending enggau silik dia Menteri Besai netapka nadai ngemaduka agih pinchin laban ngerunding pengelantang pendiau bala orang ti gawa perintah di menua tu.

Pia mega, iya ngelalau orang ti gawa perintah ngambika sepenemu sereta mantaika produktiviti kereja ti manah ngagai mensia mayuh.

“Pengelantang pendiau kita semua endang semampai diperati sereta dijaga, anang tusah ati,” ku iya.