“Bisi 16 iku raban orang ti landik ba kuntau Iban, Bidayuh enggau Melanau deka ngulu pengerami bekaul enggau seni kuntau ba Chungju, Korea Selatan.”

KUCHING: Bisi 16 iku orang ti landik ba Seni Kuntau Iban, Bidayuh enggau Melanau ngambi bagi ba Pengerami Seni Kuntau Dunya Chungju 2019 Renggat Ke-19 enggau Seni Guro Bekuntau Dunya 2019 Renggat Ke-2.

Sekretari Gerempung Kuntau Dayak Sarawak (SDMAA) Abraham Melai madah sida deka nyereta pengerami tu kena 30 Ogos ngagai 5 September di Chungju, South Korea.

“Bisi 16 iku raban orang ti landik ba kuntau Iban, Bidayuh enggau Melanau deka ngulu pengerami bekaul enggau seni kuntau ba Chungju, Korea Selatan.

“Entara sida ti enggau ngambi bagi iya nya Guro Joe Frazier Kemping enggau Soloman Achu ti deka mantaika Kuntau Iban Lama lalu disereta Guru Philip Edwin ari Kelab Kutow Rusat Rimoung Singgai deka mantaika kuntau bansa Bidayuh,” ku iya.

ANGKATKA SENI KUNTAU…Datuk Amar Douglas Uggah Embas (empat kanan) begambar kenang ba penemuai basa SDMAA ti diuluka Irwin Cartland (tiga kiba).

Abraham bejaku munyi nya ba siti penerang pengudah ngatur penemuai basa ngagai Sapit Kepala Menteri Datuk Amar Douglas Uggah Embas ba Wisma Bapa Malaysia ditu, tadi.

Penemuai basa nya diketuai Chairman SDMAA Irwin Cartland lalu disereta Penyanding Penemu SDMAA Rick Hanson.

Nitihka penerang Abraham, semina SDMAA aja gerempung kuntau ari Sarawak sereta nyadi sebuah ari dua buah gerempung menua ti diberi basa enggau diterima penuh Serakup Kuntau Dunya (WoMAU) ba taun 2016.

“WoMAU tu ba baruh pegai Unesco dalam ngetan kuntau asal enggau ngelakuka pengelikun dunya ti semina ngembuan 62 iku raban ari 42 menua.

“SDMAA tu nyadi gerempung ti ngiga, ngaga pansik enggau ngaga keretas kereja, ngemansang enggau nambahka sereta ngintu seni kuntau tradisional bansa Dayak,” ku iya.

Iya nambah, ba taun 2017 SDMAA diberi peluang ngelakuka adat enggau pesaka asal Sarawak nengah Pengerami Seni Kuntau di Chungju tu ila.

“Pia mega SDMAA enggau Gerempung Kuntau Sarawak (SKF) mayuh ngatur aktiviti baka mantaika seni kuntau di Waterfront Kuching ti digulu 2,000 orang ti landik bekuntau.

“Ba taun siti nyin kemari SDMAA enggau SKF sekali agi ngatur ‘MA2018-Tree Planting’ endur kami nanam pengerindu ngagai rampa menua nanam pun kayu baru ti digulu 500 iku bala orang ti landik bekuntau di Demak Laut,” ku iya.

Nangkan nya, iya madah pengerami nya mega deka disereta Guro Abang Mustapha Awang Khaider ti deka mantaika Kuntau ari bansa Melanau ngena ‘senjata’ enggau nadai ngena ‘senjata’ kelimpah meda pengawa bukai.