LUBOK ANTU: Juluk rayat sitak Parlimen Lubok Antu ngasaika bekal ai beresi deka nyadi nyata pengudah Perintah Besai setuju nangkup peminta nya.

Berita manah tu udah dibantaika Menteri Pemansang Menua Pesisir Rina Mohd Harun nengah jaku timbal iya kena 8 Julai 2019 tu tadi.

Dulu ari nya, Kaban Parlimen Lubok Antu Jugah Muyang enggau ati ransing ngemai peminta rayat ngagai Aum Parlimen tu tadi.

Rina ba timbal iya madahka projek Bekal Ai Menua Pesisir (BALB) ba Lubok Antu Renggat II udah dikemendar ba Langgur Pemansang Malaysia Lumpar Ke-11 (RMK11) enggau ungkus RM117.837 juta.

Penembu projek tu disadang meri pengelantang ngagai 54 bengkah genturung pendiau enggau lima buah sekula ditu tauka 1050 buah rumah (20,112 iku peranak) iya nya 70 peratus ari penyampau tubuh rayat di Lubok Antu.

Tinda projek tu udah dikeluar kena 20 Jun 2019 lalu projek deka dipejalai kandang 24 bulan tauka tembu ujung taun 2021.

“Kitai berasai lantang ati laban projek tu deka digaga enda lama agi lalu tu deka mutarka penanggul kelimpah ngasuh juluk rayat ke lama udah nganti projek bekal ai beresi tu nyadi nyata.

“Penembu projek tu deka ngelantangka rayat ditu lalu sida badu agi irauka pemeresi ai ke dikena,” ku Jugah.