KAPIT: Mensia mayuh ti landik ngaga barang kraf jari patut berunding panjai ngiga chara ngelakuka produk ke ditempa sida.

Sapit Ketuai Direktor (Dagang) Mara, Datuk Zulkifli Osman mansutka penerang tu lebuh bejadika Handricraft Kapit Now In Digital ke diatur ba Rumah Richard Engking ditu, apin lama ke udah.

Zulkifli madah, nengah media rama ke bisi kemaya hari tu, dia pengawa bejualka asil produk digaga nengah pegelandik mensia mayuh kelebih agi ba Kapit ulih dikerembai ke agi ngagai menua bukai.

“Enti sema kita nyual asil pengelandik jari ba kedai, semina orang ke semak enggau kita diau aja deka ngelawa kedai nya,”

“Nengah media rama, ukai semina nya aja tang orang luar ulih sama meli produk ari kita,”

“Kelimpah ari ngelakuka produk kita diak mega ulih ngelempungka agi belanja dikena mayar sewa kedai ,” ku iya

Beduduk ari nya, iya ngelalau orang ke ngasilka pegelandik jari patut nemu bekena ke media rama tauka app baka Facebok, Lazada, Shope, Instagram tauka alai bejual digital ke bukai endur nyual produk sida.

Kelimpah ari nya, Mara udah nyediaka ungkus belanja sepenyampau RM830,000 lalu nyediaka urung iya 36 kos lalu ngembing lebih 1200 iku ke bisi potensi nyadi orang dagang ke mujur dikena nambahka penatai pemisi ruang bilik.

Kena 19 Jun ngagai 20 Jun tu tadi Kos Pemansang Asil Pengelandik Jari (Handicraft Development Course) udah diatur ba rumah panjai tu tadi

Maya tu tadi, sepenyampau 26 iku orang ke nyereta kos tu nerima insentif ari segi mata duit enggau perengka dikena ngaga asil pengelandik jari ari Mara.

Sama bisi datai, Direktor Mara Sarawak, Dr Azmi Amat Murjan enggau ke bukai.

SERURAN NYUKUNG…Zulkifli (tiga kanan) bejadika Kapit Handicraft Now in Digital lalu disempulang bala temuai ke bukai