“Taun tu kami ngarapka sebagi ari rega tikit nyereta TGRZ deka diberi ngagai raban Penan dikena ngemansangka pelajar nembiak enggau kualiti pengidup sida.”

KUCHING: Great Rimba Zumbathon (TGRZ) ti diatur Gerempung Pengatur Konvensyen enggau Mandangka Barang Malaysia (MACEOS) Sarawak ngandalka bulih urung RM2,000 dikena mantu anak Penan ba pekara pelajar.

Chairperson MACEOS Gracie Geikie madah tu sebengkah tanggungpengawa rama koporat (CSR) sida dikena nyukung nembiak Penan ba menua pesisir awakka bulih pelajar sekula ti meruan.

“Taun tu kami ngarapka sebagi ari rega tikit nyereta TGRZ deka diberi ngagai raban Penan dikena ngemansangka pelajar nembiak enggau kualiti pengidup sida.

“Kelimpah mantu raban Penan, raban penyereta mega bulih pemaik ari aktiviti bepengerai baka tanda zumba,” ku iya.

Gracie bejaku munyi nya maya bejadi TGRZ di Balai Gerempung Dayak Bidayuh Nasional ditu, kemari.

Tandu iya, urung 250 iku mensia mayuh ti ngambi bagi dalam nyereta tanda zumba kemari.

“Kami mega ngagauka ‘Pakar’ Pelajar Zumba Seon Young Moon tauka Zes Nana ari Korea Selatan ngambika ngajar bala penyereta betanda zumba kelimpah ngerami sida.

“Mensia mayuh mega ulih sedar pemadu guna nyaga pengerai ari ‘besenam’ sereta ngurangka gemuk kelebih agi nembiak di Sarawak,” ku iya.

Ku iya kelimpah TGRZ sida mega bisi ngatur pekara ngelakuka barang baka bejual marik Bansa Bidayuh, beperesa pengerai ari Opis Pengerai, bazar pemakai, chabut tikit benasip sereta licha peransang ngagai nembiak sekula.

“Kami seruran ngatur TGRZ tiap bulan ngambika ulih mantu sida ti beguna bantu kelebih agi ba pekara pelajar,” ku iya.

Gracie Geikie (empat kiba) begulai engga bala bukai nekan terumpet kelai bejadi TGRZ di Balai Gerempung Dayak Bidayuh Nasional ditu, kemari. -Gambar RAMIDI SUBARI