Enti orang bukai ulih, nama ga kebuah kitai enda!

Agi menya, pengawa belagu enggau bemain muzik semina nyadi pengawa ngisi maya lepa aja. Beperindang diri sama diri lalu kekadang nguji ke pengelandik diri belagu enggau nebah gitar udah chukup ngasuh ati puas.

Maya nya skop dunya pemerindang bedau besai laban teknologi penabur enggau media rama bedau baka ke diatu. Taja pan pia, pengerindu nya udah ngepunka aktiviti seni diri lalu iya tau nyadi ke lubang penatai pemisi enti betul chara kelebih agi ari segi undang-undang enggau akta dagang.

Berita pemerindang minggu tu ngenang siti topik ke patut ditemu semua anak seni ukai semina ba pekara muzik enggau lagu tang ba semua pengawa ti ngaga utai sekalika ari runding tauka ari pengelandik jari.

Semua asil ti ditengkebang tauka digaga kitai nyadi reta tauka aset ti bisi rega. Iya bisi rega enti iya diatur nitihka akta enggau undang-undang ari ejensi ti bekuasa.

Royalti tu iya nya bayar ti diterima ari orang ti megai lisin ngagai orang ti nyendiaka lisin ba siti-siti reta tauka aset ti benung diguna dikumbai “reta intelek (penemu)”.

TANGGUNGPENGAWA BESAI…Presiden RPM, Dato Sheila Majid iya nya siku orang ti megai tanggung pengawa ngumpul royalti lagu sereta muzik di Malaysia.

Selalu iya royalti dibayar ngena chara peratus ari utai ti dijual dikira dalam kira unit barang ti diguna tauka dijual nya. Ambika banding siti VCD/CD, kaset, lagu enggau utai bukai.

Royalti enggau reta penemu

Royalti chukup beguna laban iya meri kitai kuasa tauka hak ti nadai tatak seagi utai nya ari baruh kuasa kitai ba sepemanjai timpuh ti deka datai.

Nitihka atur ba menua tu, semua aset tauka reta kitai meseti diripot ngagai Kaunsil Penatai Pemisi Dalam Menua (LHDN).

Ari sukut aset seni muzik, lagu tauka asil seni bukai mega mesti meseti dirikod ereta direjista awakka reta / set temu orang empu lalu orang bukai nadai hak ngambu aset nya enggi sida.

REJISTER RETA KITAI…Sekeda ari raban pengemeran seni lagu Iban di Sarawak ti bisi nyereta sebengkah bengkel juri pekit belagu ke diatur di Kuching kena 30 Julai tu tadi.

Reta nya utai ti dijaga ulih siti “entiti” (orang tauka gerempung) ke alai reta nya ulih ngenataika pematai pemisi lalu iya patut pulai ngagai orang tauka “entiti” ti nyaga enggau ngempu iya.

Hak penemu tauka “intelectual property (IP) nya utai ti digaga ngena pengelandik runding diri. Orang ti ngaga tauka nengkebang utai (keresa tauka reta) nya bisi kuasa “esklusif” ari baruh undang-undang sekali ke dalam bidang muzik, ngarang, pekara seni bukai, simbol tauka langkar.

Semua utai nya tadi tau dipeda kitai ba “hak nengkebang, chap dagang, paten enggau hak ngelangkar.

Sapa bekuasa ngumpul royalti?

Royalti semina ulih digumpul kaunsil ti bisi lisin ti diberi kuasa ari Pemesai Hak Nengkebang Reta Penemu Malaysia (MyIPO).

NYADIKA KENANG….Patrick (tengah) begambar kenang enggau bala bukai rambau datai ngemujur sebengkah bengkel ke diatur di Kuching apin lama ke udah.

“Kaunsil belisin nya siti organisasyen ke udah diberi kuasa tauka hak ari orang ti empu reta (pengemeran seni). Organisasyen tu mih ti ngatur reta tauka asil seni bala anak seni.

Tanggung pengawa kaunsil belisin tu nya ngatur lisin hak nengkebang, ngumpul royalti, magi royalti ngagai pengempu hak nengkebang enggau ngatur undang-undang ti patut nitihka tuju enggau guna iya.

Akta Hak Cipta 1987 kenyau ari taun 2012 suba udah meri kuasa ngumpul royalti ngagai empat iti organisasyen di Malaysia. Empat iti organisasyen nya Public Performance Malaysia Sdn. Bhd (PPM – ngarika kompeni rikod), Music Authors’ Copyright Protection Berhad (MACP – ngarika penulis lirik enggau komposer), Recording Performers Malaysia Berhad (RPM – ngarika penanyi & pemuzik) enggau Performer’s Rights snd Interest Society Malaysia Berhad PRISM – ngarika penanyi, prmuzik,). Empat organisasyen nya tadi diberi kuasa ngumpul royalti kd besangkut-paut enggau kategori muzik.

Nambahka nya, MyIPO udah mega meri kuasa ngagai Music Rights Malaysia (MRM) ti ngarika empat organisasyen di atas nya tadi. Enggau tu, berengkah ari taun 2017, pekara ngumpul royalti mesti betanya tauka mansa MRM dulu.

Chara ngerejister reta

Sebedau bulih royalti ari aset (lagu, muzik enggau utai bukai), kitai patut ngerejista tauka ngisi pom ari organisasyen ke besangkut-paut enggau diri empu. Ba pom nya penerang diberi enggau chukup silik lalu kitai mega dipinta nganjung dokumen ti diguna sida.

Ari semua penerang ba pom nya tadi, royalti deka dipasuk nitihka atur ti udah digaga. Pemayuh royalti nya bepanggai ba pemayuh reta diguna.

Artikel minggu tu semina kenang ngelansa pasal kuasa enggau chara ti betul kitai bulih royalti ari reta penemu diri. Orang ke udah dulu enchelak pasal pekara tu ulih idup senang ari royalti aset seni sida.

Ngena peluang tu aku meransang semua artis Sarawak ngerejista asil pengelandik diri enggau ba orgsnisasyen baka ti udah dipadah di atas tadi. Anang irauka diri empu dudi asal kitai udah berengkah.

Ngagai kaban artis ti udah nemu jalai pasal royalti enda salah bekunsi penemu enggau sida ti bedau. Anang rangka au.

Gerempung Armada Anak Seni Sarawak (Aras) iya nya siti gerempung baru ditumbuhka di Sarawak. Tuju iya ti bendar deka ngaul semua artis enggau anak seni begulai ba ARAS.

Ari nya kitai ulih ngaga atur begulai enggau perintah sereta enggau ejensi organisasyen ti besangkut-paut.

Udah datai maya kitai di Sarawak ngadu sereta ngaturka pekara royalti ti endang ungkup kitai. Anang nganti orang bukai ngatur kitai laban atur orang enggau atur diri empu tetap enda sebaka.

Ngagai kita ti deka nemu silik agi padal royalti tau betanya ari pangan artis ti udah kala nerima lalu tau mega betanya ari Chairman Aras, Patrick Kamis; siku ari komposer tebilang ke udah mayuh nerima royalti.

Aku minta kita ngemanjai sereta nambahka info tu ngagai pangan ke bukai. Enti sema bisi info ti rapas tauka limpang aku minta ampun.

Enggau tu aram mih kitai nitihka singkang sida (artis) di Semenanjung Malaysia laban udah mayuh sida din idup lantang ari royalti. Kitai pan ulih baka sida enti kitai nemu sereta rajin ngaduka diri. Enti orang bukai ulih, nama ga kebuah kitai enda!