KUCHING: Mayuh pekara ti ulih diripot ngagai piak Komiti Hak Pendiau Rayat Malaysia (Suhakam) lalu rayat Sarawak udah sedar enggau hak sida, ku Ketuai Suhakam Sarawak Dr Madelin Berma.

Ku iya, pekara ti pemadu mit ti nyengkaum hak pendiau mensia ulih diripot ngagai piak sida.

Tu nyengkaum pekara bekaul enggau hak orang nyelai pendiau (OKU), enda ulih sembiang ‘solat’ (ngagai sida ke Muslim) sereta pekara ke bukai.

“Enti kitai ti bekuli tu nadai hak sembiang ‘solat’ tauka betudung, tu nunjukka kompeni nya kelebih agi pengaji udah ngayahka hak pengereja pengawa,” ku iya lebuh dirandau raban pemberita Suara Sarawak.

Ku Madeline, genap pengawa naip ba media rama baka Facebook ti bisi ngemedis tauka ngajum orang mega ulih diripot ngagai Suhakam.

MAJAK DIKELALA… Dr Madeline Berma (kanan) lebuh dirandau raban pemberita Suara Sarawak di Opis Suhakam ditu, ensanus.-Gambar Nadim Bokhari

“Pekara ti bekaul enggau pengarap, bansa sereta ke bukai enda tau sekali nyadika alasan kitai ngemedis tauka ngajum orang bukai.

“Ambika chunto, enti sema bisi orang nguji ngambi gambar kitai, diri sebilik lalu mantaika identiti kitai laban nguji deka ngemediska kitai, nya tau diripot ngagai kami (Suhakam) laban nya dikira ulih ngemedis kitai,” ku iya.

“Enda ngira berapa lama pekara nya udah nyadi, taja udah bepuluh taun tang enti agi bisi motif deka ngemedis, nya dikira baka hak pendiau udah diayah,”ku iya.

Kelimpah ari nya, Madeline mega madah statistik ripot ti diterima piak Suhakam Sarawak ba taun 2018 pemadu baruh iya nya semina ngerikodka 57 kes setaun.

“Pengudah guna Suhakam tu dipandangka mayuh ba media, dia aku meda mayuh orang datai ngaga ripot ba opis kami.

“Ba taun tu aja, berengkah ari 1 Januari ngagai 7 Ogos tu tadi, kami udah ngerikodka 39 iti kes,” ku iya.

Tu nunjukka Suhakam makin dikelala rayat ba menua tu lalu sida datai minta penemu sereta malin kelebih agi bekaul enggau tanah, pemaik nama enggau ke bukai, ku Madeline nerang.

Madeline mega madah piak sida deka seruran mantu lalu ngelakuka nama Suhakam ngagai rayat ngambika ulih ngemuntangka agi pengawa rayat kelebih agi dalam ngetanka hak sida.