Raban nembiak ke baru lepas SPM, STPM patut mayuh betanya enggau pengajar kaunseling

BINTANGOR : Raban nembiak patut pintar milih bidang setipak enggau pemutus peresa tauka pengulih diri kelimpah pengerindu ke bidang nya dikena nentuka diri tau teulihka pengawa pengudah abis belajar jemah.

Kaban Kunsil Nengeri (Adun) Meradong, Datuk Ding Koung Hiing madah, pengawa salah pilih kus tau ngeruga pemutus peresa kelimpah tau puntan ngapuska pelajar.

“Lebih ngenyinu ku iya, sida udah alah ba pekit minta pengawa enggau raban nembiak bukai ke lebih nyulut.

“Nya alai, aku ngalalau raban ke udah apus peresa Sijil Pelajaran Malaysia (SPM) enggau Sijil Tinggi Pelajaran Malaysia (STPM) patut mayuh betanya silik enggau pengajar kaunseling, bala staf ti ngelakuka palan peajar sida.

NAMA BERITA?…Ding Koung Hiing benung berandau enggau apai indai nembiak ke bisi datai.

“Pemuntan raban nembiak milih kus ti engkeman deka ngundang pemedis enggau mayuh penanggul bukai nyengkaum pedis teulihka pengawa,” ku iya.

Iya madah munyi nya rambau ngulu Program Kembara Ke Universiti Pom Enam Sekula Sekondari (SMK) Meradong, kemari.

Kenu ku iya, raban nembiak mega patut seruran ngaga ubah dikena napi pemar jam ke diatu.

Nya alai, Ding ngelalau apai indai terus bejalaika tanggungpengawa enggau manah dikena ngemansangka bala anak dalam bidang pelajar.

“Nengah pelajar sida deka ulih mansutka diri ari pekuh penyeranta enggau peluang ngasaika pengidup ke lebih manah. Nya alai aku seruran ngemeratka pekara tu ari sukut meri agih tauka bantu belanja.

“Nyema sida enda nerima ubah tu, penyampau orang seranta enggau nadai bulih pengawa deka majak nambah, pia mega penyampau penanggul rama mega tentu niki. Nadai chara bukai, kitai meseti ngubah diri,” ku iya.

Berebak enggau nya, Ding bisi nyuaka pemeri RM100 ngagai 164 nembiak SMK Meradong ke udah pas peresa STPM taun nyin kemari.