Diatu peranak Kuching enda ibuh jauh raun enti deka meda tauka nyepi bauh Strawberi ke agi baru laban ditu empu udah bisi iya nya ba Kebun Strawberi di Kampung Jaya Bakti, Kuching.

Buah strawberi ke bisi ba kebun tu sebaka enggau buah ke bisi ba Sabah, Cameron Highland tauka ba menua luar.
Penyauh Kampung Jaya Bakti ari pasar Kuching semina urung 30 minit aja.

Orang ke ngempu Kebun Strawberi tu iya nya Muhammad Hossen Ediwi, 63, enggau sida sebilik chukup pintar laban mujur nyadi entara pedagang buah strawberi di Sarawak.

Kebun tu diberi nama Kebun Stawberi Jantayu, baru dibuka Hossen ujung taun nyin kemari begulai enggau bini iya, Hasnah Pauzul.

Mayuh pemar dalam ngemansangka kebun tu. Nitihka penerang ari anak iya, Huzaimah Mohd Hossen, 39, sida enda nyangka ulih mujur muka kebun strawberi bedandang besai baka nya.

TUMBUH GALAK….Entara pun stawberi ke udah bebungai sereta bebuah ba nurseri Kebun Stawberi Jantayu.

“Tu kebendar bepun dikereja ujung taun 2015, maya nya apai enggau indai semina meli paung Stawberi ari Eksibisyen Betanam Betupi, Hortikultur enggau Agro Dagang Temuai (MAHA) di Muara Tuang, Kota Samarahan.

“Terubah iya, kami semina nguji nanam buah stawberi di Sarawak, laban kitai bela nemu, Stawberi muntang ditanam ba endur ke chelap.

“Stawberi endang sebansa utai tanam ke tusah idup ba tanah ke rangkai enggau bepasir.

“Tang kami pan enda nyangka strawberi kebendar ulih idup galak ba ditu taja gaya hari angat sereta rangkai.

“Tambah mega, pun strawberi tu ulih ngemansutka buah lalu nya matak ati bala bakih, sida sanggup datai ke rumah ketegal deka meda buah strawberi ke idup galak tu,” ku iya.

TUMBUH GALAK….Entara pun stawberi ke udah bebungai sereta bebuah ba nurseri Kebun Stawberi Jantayu.

Kenu ku Huzaimah, langgur penemu muka kebun tu datai ari penemu niang indai iya ti deka meda buah strawberi ditanam ba mua laman rumah sida.

“Udah nya, pun pokok stawberi ke ditanam ditaruh ba rumah kelalu mayuh ngujungka kami berunding ngiga endur ngengkah semua pun strawberi nya.

“Apai aku kala merambu deka ngengkah pun strawberi nya ba tanah iya. Tambah mega sida endang bisi tanah puang seikar.

“Pemutus nya disukung niang indai. Niang indai mega madah deka numbuhka sebuah nurseri pun strawberi.
“Kelimpah nya,

Kelimpah nya, indai mega deka meda bisi palan makai ungkup bala temuai, belelak, enggau balai raya khas ngagai temuai ti ngabas nurseri pun stawberi,” ku iya.

Tandu Huzaimah, maya nurseri benung digaga, enda mukai-mukai indai sakit raya ti ngujungka iya nadai.

Taja pia, ransing ngamatka juluk ati niang indai, dia apai aku, Mohd Hossen nampung pengawa nya nyentuk mujur muka kebun stawberi tu.

“Kebun Stawberi Jantayu ngambi awak ke chukup lama endur tembu meruan ketegal mayuh pemar ditapi.

“Ba tengan taun 2018, asil pengeransing enggau sukung mensia mayuh dia, Kebun Stawberi Jantayu ulih tembu enggau menyana, “ku Huzaimah.

Entara perengkaguna ke bisi disedia ba Kebun Stawberi Jantayu iya nya Surau, balai raya ke ulih disewa endur ngatur pengerami kelimpah endur makai. Palan makai tu endang nyendiaka pemakai enggau utai irup ari buah strawberi.

Kenu ku Huzaimah, pengawa nanam stawberi begunaka pengepuh, pengeliat ati enggau pengeransing ke tinggi. Diatu lebih 7,000 pun stawberi benung galak ba kebun nya.

“Taja buah stawberi ke ditanam ditu enda besai baka stawberi ditanam ba Cameron Highland, Pahang, tang asai iya lebih manis.

“Pun stawberi ditu patut dijaga engggau chara kediri empu laban gaya hari ditu angat, bebida enggau gaya hari ke patut baka ba Cameron Highland.

Tuju asal kami muka kebun tu endnag dikena meransang mensia mayuh ke diatu ba nengeri tu lebih agi mengeri Kuching bela nanam buah strawberi.

Kebun Stawberi Jantayu dibuka ninting Hari Enam, Hari Minggu, kemisi Hari Besai enggau kemisi sekula.
Jam dibuka iya nya berengkah pukul 9 pagi nyentuk 6 lemai. Mensia mayuh endang dipernasang datai nyukung dagang anak Sarawak tu.

SENANG ATI…Anak tauke Kebun Stawberi Jantayu, Huzaimah Mohd Hossen, mandangka pun strawberi ke idup enggau meruan.

 

PALAN BELELAK…Palan makai ke bisi nyendiaka bemacham pemakai enggau utai irup ari buah strawberi.

 

PALAN BELELAK…Palan makai ke bisi nyendiaka bemacham pemakai enggau utai irup ari buah strawberi.