KUCHING: Sarawak seruran chakah ngiga enggau ngelatih raban nembiak ti landik ba lumba nyemerai ngambi tau diangkat ngagai tikas ke lebih tinggi.

Pekara tu berupai dipeda nengah pemujur ngatur program Sarawak Short Course Sprint 2019 ti keterubah lalu udah tembu kemari.

Beserimbai enggau program nya dia, Kelab Nyemerai Power Akuatik mujur nyadi champion.

Nitihku Ketuai Pemesai Exsekutif Begulai Lumba Sarawak (CEO of Sarawak Sports Cooperation) Dr. Ong Kong Swee pekit tu nyadi sebagi ari pemungkal dikena ngajar nembiak angkunka lumba nyemerai.

“Komiti pengatur madah bisi 12 buah kelab ngambi bagi ba pekit tu ti disereta sida ke beumur 7 ngagai 17 taun.

KAMI CHAMPION…Dr. Ong Kong Swee (lima kanan, bediri ba belakang) begambar kenang enggau raban pemenang ti ngambi bagi ba program Sarawak Short Course Sprint 2019 kemari.-Gambar Nurul Fadzylyn

“Pekit tu ukai semina disereta nembiak Sarawak aja tang nembiak ari Sabah, Pulau Pinang, Kedah, Kuala Lumpur enggau menua Indonesia,” ku iya.

Kong Swee bejaku munyi nya ba pengawa nutup Sarawak Short Course Sprint 2019 ti keterubah ba Palan Nyemerai Pandelela Rinong ditu, kemari.

Pia mega, iya ngarapka pekit tu tau nyadi pelasar bala nembiak ngaul diri enggau pekit nyemerai ba tikas ti tinggi agi.

“Tu tau endur bala nembiak ngerembaika penau sereta endur bala komiti ngelala ni bagi nembiak ti bisi penau besai enggau bepekit ba tikas ke tinggi agi.

“Bisi 376 iku bala penyereta ti ngambi bagi pekit nyemerai tu lalu ba taun siti ila aku ngarapka penyampau tu tau manggai ngagai 500 iku,” ku iya.

Nangkan nya, iya mega meri pengaga ati ngagai apai indai nembiak ti udah nganjung anak sida bepekit sereta nyukung lumba nyemerai.

Kelimpah Kelab Nyemerai Power Akuatik, pekit tu mega disereta Kelab Nyemerai Kawaras, Kelab Sarawak, Kelab Nyemerai Sarakuatik Kuching, Srikl Sharkies, Kelab Nyemerai Dashing Dolphin, Kelab Nyemerai Pontianak, Kelab Nyemerai DSA, Kelab Nyemerai Excelsport enggau Kelab Nyemerai Blue Marin.

Sama datai, Presiden Nyemerai Amatur Datuk Wee Hong Seng enggau Presiden Gerempung Sarawak Tan Gun Kee.

TERUS DILATIH …Entara nembiak ti ngambi ba program Sarawak Short Course Sprint 2019 kemari.-Gambar Nurul Fadzylyn