SRI AMAN: Ekonomi digital ti dipunka Kepala Menteri Sarawak Datuk Amar Abang Johari Tun Openg dikena nyungkak ekonomi peranak di nengeri tu kelebih agi sida ke diau di kandang menua pesisir lalu enda ngelaungka sida di mengeri besai.

Nengah pengawa bekenaka Teknologi Pemadah enggau Arus Penyambung (ICT), raban orang dagang ti ngaul diri dalam industri asil pengelandik jari mega deka nyingkang nitihka singkang peranak menua maju ti udah dulu ngerandang jalai dalam dunya ekonomi digital.

Peranak asal Sri Aman, Angelia David Langi, lebih sepuluh taun udah ngaul diri dalam bidang asil pengelandik jari baka manik, seramik enggau ngaga sabun ari madu kelulut, nerima manah penemu enggau pengawa ti dipejalaika kepala menteri nya.

Ku Angelia, penemu ICT enggau konsep ekonomi digital kemaya hari endang beguna endar sereta ngemai mayuh pemaik ngagai sida ti ngemeranka dagang di menua pesisir lalu tu nyadika peransang ngagai sida ransing agi nempa pemujur bedagang dataika renggat entarabansa.

Nya kebuah ku Angelia, iya andal amat teknologi tu nyadi sebagi ari pengawa dikena ngubah Industri Mit enggau Jelan Pemesai (IKS) baka industri asil pengelandik jari di menua tu ngambika bisi makit ukai semina ba menua tu aja tang mega ulih rembus ngagai makit menua luar.

REGAS… Angelia mantaika asil pengelandik jari iya empu rambau Showcase Inkubator MIED Sirim 2018 di Sibu.

Iya ke mega nyadi Bakih Ngembing Pedagang Sarawak (RPUS) seruran nyikap diri ngena penemu baru enggau ngansah pengelandik kelebih agi dalam teknologi digital ngaul seramik, inkubator enggau ke bukai nentuka diri ulih nangkup peminta makit industri nya.

“Dalam industri kraftangan, kami endang diperansang bekenaka teknologi baru kelebih agi ICT ngambika kami ngembuan rentayan dagang ti besai agi, ukai semina bisi tagit ba dagang dalam menua, enti ulih ngemai asil kraf ngagai renggat dunya.

“Ba aku empu, ekonomi digital tu nyadi pelasar pemadu manah dikena ngerandang jalai ngemansangka dagang diri sereta nyerungkai mayuh agi penemu ti bekaul seraya belajarka chara bekenaka teknologi baru,” ku Angelia, ke mega kaban Serakup Pedagang Wawasan Indu Sarawak (Saranita).

Ngena chap dagang Carana Enterprise (CE), Angelia ngemai nama Ant’s Beads ungkup produk seramik enggau manik seraya Ant’s Soup ungkup produk sabun digaga iya empu.

“Sabun digaga aku empu di rumah, digaga ari madu kelulut, arang enggau kulit kayu manis ti manahka pengerai kulit sereta ngasuh kulit mua alus enggau burak, ulih muai kulit mati.

NARIT ATI… Sekeda ari keranjai jari Angelia ngena leka seramik enggau manik

“Tiga bansa produk sabun tu diberi nama Sabun Propolis Kelulut (Stingless Bee Soup), Sabun Sabun Arang (Charcoal Soup) enggau Sabun Kulit Kayu Manis (Ceylon Cinnamon Soup).

“Kelimpah ari nya, aku mega bisi ngaga minyak angin tauka Balsem Kelulut ti tau ngasuh isi berasai nyamai entu berunsut ngena minyak angin tu sereta bebau rengut,” ku iya nerang.

Ngelama tu aku endang fokus ba dagang asil pengelandik jari ari manik enggau seramik ti digaga aku empu ari tanah ladu lalu nerima mayuh peminta.

“Semua aktiviti enggau pejalai dagang aku bisi dikunsi ba laman Facebook Ant’s Bead enggau instagram aku empu kelimpah ulih digiga nengah portal online bukai,” ku iya ngelansa.

Inisiatif dipejalaika Telekom Malaysia ™ ngenegapka penuduk iya nyadi peneraju konvergens di Malaysia, nyendiaka servis penyambung ti deras mungkur semua servis unifi ngagai Bagi Menua Mukah taun nyin tadi.

BAJIK… Tengak nunda buah kabo’ ari komuniti Orang Ulu

Angelia beratika servis unifi di Mukah nya engkeman enggau maya iya laban Sarawak diatu benung nyerungkai enggau ngemansangka ekonomi digital dikena ngerumban ekonomi tumbuh.

Ku iya, infrastruktur telekomunikasyen dikena nyukung sambung internet ti deras patut disedia nentuka ekonomi digital ulih dikemujur sereta meri pemaik ngagai komuniti dagang enggau peranak menua nya.

Nya alai Angelia bisi amat pengandal pedagang asil pengelandik jari ulih ngerebut peluang sereta ngansak ejensi bekaul ngerembaika bungkur arus penyambung ngagai bagi menua bukai nyengkaum Sri Aman.

“Enti ulih, pengudah TM ngangkatka tikas peneras sambung internet di Bagi Menua Mukah, kami di Sri Aman mega ngandalka diri deka nerima sereta ngasaika servis ke sebaka ngambika kami jampat agi ulih ngaul diri dalam ekonomi digital sereta nempa dagang datai ba tikas antarabansa.

“Ari pemisi sambung internet ti deras, dagang mega deka lanchar lalu ulih dipejalai ba sebarang alai, nadai tatak jam enggau endur, nentuka produk kami ulih dijual sereta dikelaku.

KERESA LAMA… Buah pelaga entara manik lama Iban diangkat Angelia nyadi tengak.

“Nengah servis tu kami mega deka ngembuan rentayan dagang besai agi, penatai pemisi mayuh agi dikena nangkup belanja idup tinggi pangka ari ekonomi dunya ti enda tegap,” ku Angelia nyemetak.

Tambah mega ku iya, 21 Julai tu tadi Kepala Menteri Sarawak mega udah ngelancharka Sarawak Pay di Sebauh, Bintulu lalu chara bebayar digital tu naka diatu bisi 100,000 penguna enggau 6,000 pedagang rejista.

Angelia beratika servis Sarawak Pay tu manah amat nipakka ekonomi menua ngalih ngagai ekonomi digital ti mungkur pengawa betanam betupi, dagang, industri, dagang temuai enggau servis perintah.

Ku iya, nengah chara bayar baka tu kitai ulih mayar enggau nganjung duit ngena chara digital ba sebarang alai, enda kiruh masau jam ngelawa bank tauka perengkaguna bukai.

Ngelama tu ku iya, sida mega semina bepanggai ba pengawa ngaul diri dalam ekspo enggau pengawa bejual ke bukai lalu makit semina naka nya aja. Tambah mega, timpuh endur bejual tauka mandangka produk bisi tatak.

MAYUH GUNA… Angelia mega ngaga minyak angin tauka balsem ari madu kelulut.

“Pengeran kami ke datai ari jauh, napatka mengeri besai baka di Kuching, nyereta ekspo enggau pengawa ke bukai.

“Ambika chunto, nyerumba Ekspo SME enggau Kayu Ramu Sarawak 2019 berengkah ari 27 nyentuk 30 June tu tadi di Palan Aum Borneo Kuching (BCCK) di Kuching, bala pedagang asil pengelandik jari entara pemadu mayuh nyereta pengawa mandangka produk sida.

“Kami nemu bisi peminta ke tinggi, tang mar ditangkup laban nadai sambung internet tauka palan ti engkeman endur ngelakuka produk,” ku iya, ke mega kaban Society Craft Achievement Rural Folk Sarawak.

Nya alai, iya ngarapka piak opis enggau ejensi bekaul mega ulih numbuhka Palan Inovasyen di Sri Aman baka ti udah ditumbuh di Sarikei bedau lama ke udah laban peranak di menua nya mega begunaka palan ke sama dikena ngulihka penemu, penerang enggau pengelandik ke patut ari palan nya.

Iya beratika palan nya endang chakah bejalaika pangku pengawa diri nengah pengawa ngatur Seminar e-Dagang Digital enggau Worksyop e-Dagang ti diatur begulai ari baruh Kaunsil Pemansang Orang Dagang Bumiputera (MPUB) enggau Seksyen Indu Balai Dagang Bumiputera Sarawak (DUBS Dewanita) ke nyadi program pemungkal.

Ku Angelia, program ke bansa nya ti patut chakah agi dipejalai lalu ngaul raban orang dagang di menua pesisir kelimpah ari program Gelempung Internet ti deka nyadi peransang ngagai pemujur juluk ekonomi digital di nengeri.

Kala nyadi penyereta Inkubator Seramik MIETI Sirim Sarawak, Angelia endang bisi besai pengarap ekonomi digital deka nyapai juluk iya, ngubah Sarawak ngambika mansang sereta maju dalam dunya digital, tang mega deka ngubah kuing runding peranak di nengeri tu nyadi pedagang digital.

“Juluk ati deka meda industri asil pengelandik jari kelebih agi seramik ulih mansang nyerumba pemansang ICT dunya enggau ekonomi digital,” ku Angelia nyimpul randau enggau Suara Sarawak.

 

NYINUK… Angelia benung nusuk leka manik nyadika tengak moden ti nerima mayuh peminta.

 

PEDAGANG DIGITAL… Angelia ngelakuka asil pengelandik jari digaga ari manik enggau seramik.