KUCHING: Tibak penemu dagang ekonomi digital engka pekara baru ba raban bansa Dayak tang patut diserungkai dikena ngemansangka diri ba pengawa tu.

Berindik ari nya, Martin Saba Changgai enggau bini iya, Mageline Pidang Anye ngerebut peluang ngemajuka Michelle Grace Touch Bridal & Studio tauka dikumbai MGT Studio ti ditumbuh dalam taun 2012.

Suara Sarawak bisi limpang ngerandau Mageline Pidang, 36 taun, siku indu bansa Kenyah ari Uma Sambop Belaga, ngarika MGT Studio ti dipungkal laki iya empu.

Ku iya, Martin endang meransang iya bekenaka pengelandik ngantaka orang, pengawa dikerinduka iya kenyau ari sekula sekondari suba.

“Iya (Martin) suah meri peransang ngagai aku ngansah enggau nguna pengelandik jari ngantaka orang laban ngelala penau tu ulih dikemansang nyadi dagang kemaya hari.

NEMBAN: Antara keranjai jari MGT Studio ti ngangkatka konsep bungai Dayak.

“Sukung tegut ari kami sebilik kelebih agi laki aku ti bela angkunka pengawa ngantaka orang, ngasuh aku ransing agi chakah ngaul diri ba dagang tu,” ku Mageline.

Kala nyadi tiga pemekit pemadu nyulut ba Pekit Keligit Orang Ulu Renggat Bagi Menua Bintulu (2003) enggau Renggat Nengeri Sarawak (2004), Mageline ngemanjaika singkang diri seraya nyaup laki iya ngemansangka dagang MGT Studio.

Ku iya, bepun ari dagang mit dataika ulih numbuhka studio Kediri empu, seduai melaki bini mujur mansutka belanja tambah ngagai sida sebilik sereta nempa nama sebaka enggau bala bukai ti ngemeranka dagang sebaka.

“Laki aku, Martin, landik amat ngelagu buk, bemacham gaya, ngujungka kami duai sepenemu nyendiaka servis nganta enggau ngaga buk nengah studio lalu asil jari seduai endang chulin ditengkebang ari penemu diri empu.

“Nambaka nya, kami duai mega meransang diri ngemayuhka bansa servis baka nyendiaka panggau endur orang beterang, betunang tauka tikah,” ku Mageline nerang.

BAKA PINANG DIBELAH DUA… Seduai ti beterang jadi laki bini digari ngena chukup ngepan kitai Iban ti disediaka MGT Studio nyengkaum panggau.

Jeman diatu udah ngalih ngagai ekonomi digital lalu semua dagang bepelasarka servis online tauka dagang online nyengkaum chara berunding minta enggau nerima servis, bebayar mega nengah transaksyen online.

Pemisi servis Sarawak Pay enggau market place ditumbuh ba media rama nengah pelasar aplikasyen online, atur dagang muntang agi lalu ulih ngelimat jam ngatur pengawa.

“Nya kebuah kami duai mega berani nguji nyingkang begulai enggau bala bukai bedagang tauka ngelakuka servis nengah online baka Page Michelle Grace Touch Bridal & Studio – MGT Studio enggau Facebook Mageline MGT Studio/Martin Saba Chan.

“Pia mega sida ti deka begunaka servis enggau penerang silik pasal studio tau betanya nuju aku empu ba lumur 013-8401363 enggau Martin (019-7344931).

“Antara servis bisi disediaka studio kami duai baka Andaman Pengantin, Solekan Pengantin, Stage Make-up (kena bepekit), Pelamin Dewan & Pelamin Rumah, Hall Décor, Church Décor, Hotel Décor, Photobooth enggau Car Décor.

PENGINGAT: Mageline (kanan) enggau Martin (kiba) ngapit penyereta ti menggi gelar Selinggar Matahari Malam Gala Sarawak 2018.

“Studio kami mega bisi nyendiaka suwa ngepan Iban, indu enggau lelaki, dikena rami melah pinang enggau bepekit sereta suwa gaun enggau kut sereta kereban ke bukai (aksesories) kelimpah bejualka minyak wangi enggau produk kecantikan ari FFC Colour Cosmetic,” ku Mageline ngelansa.

Kelimpah ari nya, orang ti nyadi peransang Mageline ngaul diri ba bidang tu iya nya Dewi Tian, siku juru solek ari Indonesia sereta bakih iya empu, Ramenda Kiyek di Miri.

Studio seduai mega kala melanja makeup enggau baju dikena emcee Anugerah Carta Sapa Juara (ACSJ) 2016, DJ Lucia Thomas Kasau enggau ACSJ 2017, DJ Stefahie Jeffery.

“Tu kenang manis kami duai udah bekerejasama enggau raban RTM Bagi Iban ngemujurka pekit ti ngangkatka artis Dayak sereta kelai sukung ngagai industri pemerindang kitai menua tu,” ku iya nampung.

MGT Studio naka diatu nadai kala nerima bantu ari sebarang ejensi perintah tauka peribit lalu semua pemujur dagang seduai bepanggai ba pengepuh enggau pengeran diri ngemansang enggau ngangkatka nama ba dunya dagang sebaka enggau orang bukai.

“Baka orang bukai mega, kami duai chakah ngambi kus bekaul enggau bidang diri empu, nganta enggau ngaga buk ba menua tu enggau Semenanjung.

“Aku pechaya kitai deka teulihka asil belipat enti ngena teknologi ke pemadu baru baka dagang online kelebih agi diatu nyauka semua pengawa kitai dikereja nengah online.

“Ba aku empu, tu sebagi ari pengawa dipejalaika perintah ngemuntangka atur pengawa enggau ngelimat jam gawa,” ku iya nerima manah pengawa dipejalaika Perintah Sarawak nya.

Pia mega ku iya, semua utai ulih dijapai enti kitai puh enggau enda mudah mantul ngapa ngereja pengawa ti dikingin ati.

Nya kebuah iya suah meransang diri anang leju belajarka penemu, penau enggau pengelandik baru laban ari nya kitai ulih mekit pedagang bukai, ti sama bidang tauka dagang enggau kitai, ngambika servis disedia manah agi, tetangkupka peminta kemaya hari.

“Penemu Teknologi Pemadah enggau Arus Penyambung (ICT) endang nyadi duku penebas kitai ngerandang jalai dagang dikaul kitai.

“Enti suba, kitai bumai bekenaka kereban gawa ngambika umai nyadi lalu asil padi manah.

Baka nya mega kitai ti bedagang, mesti pintar runding bekenaka kereban ti patut enggau awak ti bisi disedia.

“Besai juluk ati aku ngarapka dagang ti dipunka kami duai melaki bini majak mansang sereta maju nitihka singkang enggau ubah pemansang dunya kemaya hari kelebih agi ngaul dagang ekonomi digital.

“Endang utai dijuluk ngambi ulih ngerembaika dagang tu ukai semina di bagi menua Sibu aja, tang mega nempa nama renggat antarabansa kelimpah ngetanka pesaka asal kitai Dayak ba dunya dagang,” ku Mageline nyimpul randau.