KAPIT: Gawai Timang Nama Tuah iya nya sebengkah gawai bansa Dayak Iban ti jarang diintu kemaya hari.

Senutuk enggau nama gawai tu, tuju pengawa diatur mega dikena namaka tuah ngagai ruang bilik orang ke ngempu enggau nirika gawai nya.

Gawai Tuah tu mungkur dua bengkah renggat pengawa iya nya Nimang Ngiga Tuah enggau Gawai Timang Nama Tuah.

Orang ke begawai sekali tu iya nya Tuai Rumah Marung anak Kemarau, diintu di Rumah Marung, Sungai Belawai, Kapit kena 31 Mei nyentuk 1 Jun 2015 nyerumba pengerami Gawai Dayak taun nya.

Suara Sarawak bisi limpang bejalai nemuai seraya nangkup kangau ngabang lebuh hari gawai nyadi.

UNGKUP SIDA LELAKI… Sida sebilik ke ngempu Gawai Timang Nama Tuah, Tuai Rumah Marung Ak Kemarau (dua kiba). Sida tiga ke lelaki, bela megai Babi Sandau ungkup diri.

Tumu pagi 31 Mei, sida sebilik ke ngempu pengawa tu meri Babi Sandau enggau Babi Tuah mandi ba ai kerangan rumah panjai nya.

Berebak enggau nya, orang ke di rumah mupuk begaga enggau nirika langkau endur Babi Sandau enggau Babi Tuah gali.

Langkau Babi Sandau digaga di tanju seraya langkau Babi Tuah ba bilik besai, ke alai langkau nya bela dibap tauka diseruyung ngena pua kumbu enggau endur babi gali diselap ngena tikai anyam bebuah.

Sida ke indu mega berengkah ngira rengka piring enggau perengka bukai dikena gawa sehari nya nyengkaum nyendia enggau bebelaka pemakai ba bilik orang ke ngempu pengawa.

Pengudah semua babi dipandi, sida lalu mulaika diri ke rumah panjai lalu ketetiga Babi Sandau tadi digali ba langkau di tanju lalu Babi Tuah dibai tama ke bilik sereta digali ba langkau iya.

BERENGKAH MIRING… Pengawa Miring Gawai Sandau berengkah dipejalaika di tanju orang ke ngempu pengawa. Piring tiga kali lapan dikena rambau pengawa tu dikereja.

Ba pengawa tu, orang ke tuai bulu sereta nemu agi reti pengawa sehari nya nguluka pengawa miring di tanju; ngena piring tiga kali lapan.

Piring tu diengkah ngimbai Babi Sandau; api pelita mega bisi ditungkun sereta enda disagi padam.

Nitih ku jerita sida, api pelita enda tau padam dikena nentuka semengat orang ke ngempu pengawa nya enda liar, enda midang ke menua bukai.

Pengawa miring tu disempulang enggau tabuh; tawak enggau bebendai dipangkung, dikena nejal pending sida ke di tanju ngambika enda ninga sebarang kutuk ke enda manah.

Tembu miring di tanju, bala lemambang berengkah nimang seraya bejalai ngelingi pandung ke diselubung ngena pua kumbu.

Pandung tu tadi didiri ba tengah-tengah ruai orang ke ngempu pengawa.

Dalam pandung tu bisi kebuk tengan pemesai enggau piring sekali lapan diengkah ba atas mua kebuk nya.

Lemai nya, sebedau lemambang namaka diri ke bilik besai orang ke ngempu pengawa, sida tiga dulu dibiau lalu digenselan ngena darah manuk siku.

Pengudah ngintu diri ba bilik, bala lemambang berengkah nimang; pandung ke di ruai tadi mega dibai tama ke bilik tang kebuk digali lalu pua kumbu semina ngebap iya aja.

Pia mega raban orang ke tuai berengkah miring pengudah bala lemambang ngenduh seraya piring dikena di bilik besai; dikumbai sida piring tuah, iya nya piring lima kali lapan.

Nyerumba ngintu pengerami Hari Gawai, sekayu rumah panjai nya berengkah miring genap pintu; sida ke ngempu bilik bela bekangau ngena manuk siku minta pangan diri ngulu pengawa miring ba ruai sida.

Tumu pagi nya, Babi Sandau mati lalu ditampung enggau pengawa macha ati babi nela nasit sida sebilik.

Pengudah tembu pengawa di tanju, sida lalu mulaika diri ke bilik besai sereta pengawa munuh Babi Tuah pan berengkah.

Pengawa macha sereta nela tuah ati babi nya lalu dipejalai pengudah Babi Tuah mati.

Gaya ati Babi Tuah tu ngayanka tuah sida sebilik seraya tembu semua pengawa nya tadi kelai penembu Gawai Timang Nama Tuah.

NELA TUAH… Gaya Tuah ba Ati Babi nya dipandang ngagai lemambang sereta mensia mayuh ke ngelala macha tuah ba ati nya.

 

DIGALI DI TANJU… Ketetiga Babi Sandau, pengudah diberi mandi, digali ba langkau ke digaga di tanju.

 

NAMAKA TUAH… Pandung di ruai tadi bela dibai tama ke bilik, tang kebuk digali sereta dibap ngena pua kumbu, endur mensia mayuh ke tama ke bilik nya namaka pemeri mata duit kelai namaka tuah ngagai ruang bilik nya.