KUCHING: Komiti Hak Pendiau Rayat Malaysia (Suhakam) Sarawak seruran beratika penanggul ditapi rayat menua tu.

Tu mega nyengkaum mutarka penanggul bansa Iban ti diau ba tanah pendam di Jalai Chawan, ditu.

Ketuai Suhakam Sarawak, Dr Madeline Berma madahka tuju komiti nya ditumbuh endang menggi pangku pengawa ngintu enggau nyaga hak pendiau rayat.

“Bekaul enggau penusah ti ditapi komuniti ke diau ba Pendam Jalai Chawan, raban kami ngaul kerejasama enggau sida dia ngambi ulih mai sebana ngena chara betul ngagai ejensi bekaul.

“Pengudah timbal diterima baru kamu ulih mantu sida kelebih agi ari sukut pengerai nyengkaum dokumen pengelala diri,” ku iya lebuh dirandau pemberita Suara Sarawak.

Dr Madeline Berma

Ku Dr Madeline, piak Suhakam nadai ngembuan sebarang kuasa deka mindah komuniti tauka pendam nya ngagai endur bukai.

“Tang kami naka ulih meri fokus mai penusah ditapi sida kelebih agi enti hak pendiau sida diayah sereta dichiping ari sukut hak ngasaika pemansang di menua tu.

“Ambika chunto, enti sema dipinta mindah ari endur nya tauka endur nya direrak enggau nadai pemendar ari sida, kitai deka negika hak sida nitihka pematut,” ku iya madah nyemetak.

Kelimpah ari nya ku iya, pemansang ba mengeri endang pekara ti dikeingin genap rayat.

“Genap kitai ti deka mindah ke mengeri patut nyikap diri enggau penemu sereta pengelandik ngidupka diri kelimpah pintar ngerebut peluang pemansang ke bisi.

“Kebuah pia, ngambika lebuh datai di mengeri, kitai ulih idup napi semua penguji enggau pemar sereta ulih mutarka diri nitihka singkang pemansang ditu,” ku Dr Madeline ngelalau mensia mayuh.