PERAMBU Presiden Joko Widodo tauka Jokowi mindahka indu mengeri menua Indonesia ari Pulau Jawa ngagai Pulau Borneo nerima timbal manah ari Menteri Kereja Raya Malaysia, Baru Bian.

Ku Baru, juluk ati Jokowi ti dekaka indu mengeri dipindah ari Jakarta ke Kalimantan endang pekara ti chukup manah sereta engkeman amat.

Kebuah pia ku penemu Baru laban Jokowi berunding mutarka penanggul menua kelalu sekut ditapi peranak ba mengeri besai di Pulau Jawa din.

Taja kitai bedau nemu dini endur indu mengeri baru deka didiri ku Baru, tang iya andal amat menua ti dipilih ila deka nyadi kelai pengangkat enggau pegari nama bansa Dayak.

Iya berasai lantang ati meda pengeran Perintah Indonesia ngintu pengelantang enggau negika nasip rayat laban pengawa mindahka indu mengeri tu deka mai empas besai kelebih agi ngagai rayat di Pulau Kalimantan.

Naka diatu bisi dua menua diperunding endur nirika indu mengeri baru iya nya adap menua tungaka Bukit Soeharto, Kabupaten Kutai Kartanegara, Kalimantan Timur enggau Kabupaten Gunung Mas di Kalimantan Tengah.

Ku iya, pengudah indu mengeri pindah ke Kalimantan ila tentu deka mai pemansang ngagai selampur menua nya nyengkaum Pulau Borneo; Sarawak, Brunei enggau Sabah.

Baru Bian

“Tu deka ngeranchakka agi aktiviti ekonomi lalu pangka pemansang deka diasaika menua kitai di Sarawak nyengkaum Sabah enggau Brunei.

“Nya kebuah tibak penemu pemansang Jokowi tu endang patut disukung lalu diterima enggau ati lantang semua rayat Indonesia kelebih agi raban bansa Dayak ti nguan menua Kalimantan,” ku Kaban Parlimen Selangau madah nyemetak.

Iya ti mega Chairman PKR Sarawak madah engka dudi hari deka dipejalai projek Jalai Besai Ngerenchah Borneo tauka Trans Borneo Highway.

Projek tu ila tentu deka meri penguntung besai kelebih agi ngagai peranak ke diau di Miri, Limbang enggau Lawas sereta kandang menua bukai.

Nangkan nya ku Baru, kitai mega bela berasai gagit baka ti diasaika 17,000 peranak Pulau Kalimantan nganti berita manah ari Jokowi mutus ni bagi menua ti deka dikemansang nyadi indu mengeri.

Ba lansa bukai, Lery Bungas, siku peranak Kalimantan, madahka diri bisi juluk enggau pengandal besai pengudah indu mengeri baru ditetap ila.

Ku Lery ba penerang Facebook ti dikunsi ba ruai Dayak, nadai ngira dini indu mengeri didiri sekalika di Kalimantan Barat (Kalbar), Kalimantan Timur (Kaltim), Kalimantan Selatan (Kalsel), Kalimantan Tengah (Kalteng) tauka Kalimantan Utara (Kaltara), iya ngarap bisi peranak asal (lelaki) Dayak deka dipadu nyadi menteri ba Kabinet menua.

Iya mega ngarap perintah deka ngaku komuniti adat Dayak ngintu rampa menua Kalimantan belalauka penau enggau penemu peranak asal menua nya.

Kelimpah ari nya ku Lery, iya ngarap perintah deka ngangkatka tusun adat Dayak ke dalam Atur Bagi Menua nyengkaum ba renggat pelilih, mengeri enggau genturung pendiau.

Tiga pekara besai enggau pengandal tu ku iya nentuka komuniti Dayak ulih nyadi ketuai ba menua diri empu lalu pekara tu mega ulih ditambah sereta nyadika peminta ngagai Perintah Besai Indonesia.