KUCHING: Mensia mayuh dilalau ngambika anang lembau beperesa pengerai nengah Skim Ngibuhka Pengerai Ungkup Raban B40 tauka Peka B40.

Direktor Opis Pengerai Nengeri Dr Jamilah Hashim madah taja napi pemar nangkup ungkus berubat ti tinggi, tang nengah skim tu sida ti ba B40 bulih empat bengkah pemaik.

“Nengah skim tu sida ulih meresa pengerai, minta ubat, insentif perengka ngubat riman enggau insentif tambang perengka pengangkut.

“Nya kebuah aku nesau rayat menua tu sampal datai ngambi bagi enggau meresa pengerai diri laban peresa pengerai tu ukai semina ba klinik perintah aja, klinik peribit ti ngerejister diri pan ulih endur beperesa,” ku iya.

Jamilah bejaku munyi nya lebuh bejadi Program Skim Ngibuhka Pengerai Ungkup Raban B40 tauka Peka B40 ba Klinik Petrajaya ditu, kemari.

Dr Jamilah Hashim

Ku iya, nitihka pansik Opis Pengerai orang ti dituntung penyakit tiga serangkai iya nya darah tinggi, kemi manis enggau tungkul ati endang matuh agi ditapi sida B40.

“Pansik nya madah enti bisi 100 iku orang ti sakit, 36 iku ari sida endang orang ba baruh B40.

“Baka nya mega penyakit riman, 60 peratus sida ti napi penyakit riman ketegal laun datai ngagai kilink.

“Enda tinggal penyakit mental, ari 100 iku orang napi penyakit tu 32 iku ari sida ba B40,” ku iya nerang.

B40 tu ungkup sida ti bulih ‘Bantuan Sara Hidup’ (BSH) nyengkaum sida ti melaki bini beumur 50 taun ke atas.
Jamilah madah, skim tu endang sebagi ari insentif perintah nengah Opis Menteri Pengerai dikena nampung guna pengerai sida ti kurang penatai pemisi serta meri fokus ngagai penyakit enda bejangkit tauka NCD.

“Anang ngelepaska peluang tu laban peresa pengerai tu enda bebayar lalu perintah besai udah ngagihka RM100 juta ngagai kita ti ba B40 nengah skim tu.

“Fokus perintah ngagai urung 800,000 iku peranak Malaysia ti ulih enggau beperesa nengah skim tu, tang nyentukka 15 Ogos semina 48,415 iku aja udah ngambi bagi iya nya semina enam peratus aja.

“Taja pia 12,000 ari sida ti ngambi bagi nya endang menua Sarawak,” ku iya.

Iya nerangka, di Sarawak sida ti ulih beperesa pengerai nengah skim tu urung 85,000 iku tang semina 13 peratus aja udah ngambi bagi taja Sarawak menua ti pemadu mayuh udah beperesa pengerai Peka B40.

Nya kebuah iya nesau mensia mayuh ti ngembuan kaban belayan ti ba raban B40 ngambika beperesa pengerai enggau jampat ngerebut peluang tu.

“Nyema kita datai ngagai klinik peribit ti bisi ‘stiker’ Peka B40 tu, kita tau beperesa pengerai dia laban urung 1,310 klinik peribit udah ngerejister diri,” ku iya.