KUCHING: Bisi 30 pintu ruang bilik ba Kampung Sungai Laru minta tanah ti alai sida berumah diatu digazet nyadi tanah kampung.

Ba genturung pendiau nya mega, lebih 100 ruang bilik ti nirika rumah ngentap ba tanah ti udah digazet nyadi tanah kampung.

Chairman Gerempung Ketuai Raban Bansa enggau Tuai Rumah Bansa Iban Bagi Menua Kuching (Pemaik) Penghulu Gunting Hiang madahka sida ti diau dia endang udah lama sebedau pemansang ke bukai digaga semak enggau genturung pendiau nya.

“Taja pia, bisi sebuah agi tanah ba genturung pendiau tu agi mengkang tanah perintah tauka diempu Opis Pelajar Malaysia (KPM).

“Diatu, bisi 30 isi rumah ti nirika rumah ba tanah nya,” ku iya lebuh dirandau pemberita Suara Sarawak.

MINTA DIGAZET… Penghulu Gunting (kanan) lebuh nganjung pom ngagai isi bilik ti diau ba tanah perintah ti minta digazet nyadi tanah kampung.

Nitihka penerang ari Penghulu Gunting, kelia endur tu alai deka nirika sekula primari.

“Enda memukai sekula nya tadi didirika ba tanah bukai, lalu tanah nya dilakka pia aja sereta enda dikemansang.

“Sida tu tadi ukai orang bukai, endang sida ari Kampung Sungai Laru ke udah ngentap ba tanah kampung iya ke asal,” ku iya.

Beduduk ari ruang bilik ti majak nambah, sida komuniti tu lalu mindahka diri ngagai tanah perintah ba belakang genturung pendiau sida.

“Rumah sida tu endang udah bisi lot lalu rintai rumah sida mega teratur sereta enda besekut enggau rumah sepiak.

“Chukai ke dibayar sida ngagai Kaunsil Mengeri Kuching Selatan (MBKS) nitih pemesai rumah, besai agi rumah digaga, besai mih dibayar sida,” ku Penghulu Gunting nerang seraya madahka pemesai tanah nya lebih seikar.

Kelimpah ari nya ku iya, udah lama pekara tu dipantaika sida tang apin bulih perati silik ari piak ke bekaul.

Nya alai, iya ngarapka pekara tu tau bulih perati ari piak bekaul lalu mutarka penanggul komuniti ba genturung pendiau tu ti ngentap ba tanah perintah.

ENTARA TANAH… Pun nyiur ti nyadi entara tanah perintah (kiba) enggau tanah ti udah lama digazet nyadi tanah kampung (kanan).

 

Papan pal Kampung Sungai Laru