KUCHING: Soldadu ari Sarawak ke lenyau di Pulau Perak deka terus digiga, ku Menteri Penyaga Menua Mohammad Sabu.

Iya madah pengawa ngiga dua iku soldadu ke lenyau nya meruan dipejalai di darat lalu operasyen di tasik deka ditampung baru nyema bisi kelai ke pemadu baru ditemu.

“Pengawa ngiga ba darat meruan dipejalai lalu operasyen ba tasik deka ditampung enti bisi kelai pemadu baru ditemu,” ku iya.

Iya madah munyi nya rambau Pengawa Betemu Enggau Kaban Belayan Lans Koperal Moses anak Logers ke diatur ba Pengkalan Udara Kuching, kemari.

Rambau betemu enggau kaban belayan soldadu nya dia Mohammad Sabu ngenataika penyinu ati bekaul enggau pengelelang dua iku soldadu nya.

Berebak enggau nya, iya bisi nyuaka pemeri bantu ngagai kaban belayan soldadu tu dikena ngelempungka tating penusah ke nuntung sida.

TERIMA KASIH…Mohammad Sabu (tengah) begambar enggau kaban belayan Lans Koperal Moses anak Logers di Pangkalan Udara Kuching, kemari.