KUCHING: Karnival Produk Kampung Ukai Kayu (NTFP) ulih nyungkak ekonomi rama mensia mayuh ti diau ba menua pesisir.

Ku Menteri Muda Perambu Mengeri, Pengatur Tanah enggau Rampa Menua Datuk Len Talif Salleh, raban pemadu beruntung iya nya sida ti mansutka asil ari kampung baka wi enggau buluh.

“Rambau pengerami renggat keempat tu, bala penyereta ukai semina datai ari komuniti enggau ejensi menua tu aja tang mega ari gerempung menua luar baka Indonesia, Nepal, Filipina enggau Laos.

“Penatai bala penyereta ari mayuh bengkah menua ulih ngangkatka makit NTFP ngagai tikas tinggi agi,” ku iya.

Len Talif madah munyi nya lebuh bejaku ba pengerami nutup Karnival NTFP di Waterfront ditu tadi.

BENASIP… Halimah Rahmat, 52 taun, ari Pelilih Pusak, menang chabut tikit benasip sebuah motosikal Honda RS150 ti disuaka Datuk Len Talif Salleh ba pengerami nutup Karnival NTFP di Waterfront Kuching kemari. Gambar Ghazali Bujang.

Nangkan nya ku iya, karnival tu mega sebagi ari pelasar ngelakuka NTFP Sarawak ngagai renggat dunya.

“Tu mega peluang kitai belajar ari menua bukai kelebih agi ba pengawa mansutka mayuh agi bansa produk NTFP.

“Nya alai, dikena mantu bala pedagang enggau penengkebang produk ukai kayu, program enggau bantu patut disedia kelimpah ari ngatur pengawa mandang,” ku iya.

Ku Len Talif, tu nyengkaum bantu khas, sukung ba makit sereta pemansang ba dagang nipakka tuju enggau juluk kitai nyapai penyulut ba pengawa tu.

Pengerami diatur enam hari berunggu sekali tu teulihka penguntung RM300,000 sereta nambah ari taun ke udah.

Sama datai Direktor Babas Sarawak Hamden Mohammed, Menijar Besai Koperasi Pemansang Industri Kayu Ramu Sarawak (STIDC) Hashim Bojet, Sapit Direktor Kampung Sarawak Jack Liam sereta bala pengari bukai.