KUCHING: Serakup Graduet Dayak Sarawak (SGDA) nyukung penemu nengkebang digital ditibak ari penemu Kepala Menteri Datuk Patinggi Abang Johari Tun Openg dikena nangkup pemansang Industri Revoslusyen 4.0 (IR4.0).

Presiden SGDA Gary Ningkan madah, sida bisi pengandal kaban serakup nya enggau Kepala Menteri patut sepenemu kelebih agi ba pekara pelajar tinggi bala nembiak.

“Bansa Dayak enggau nembiak ti belajar ba palan pelajar tinggi patut sepenemu enggau Kepala Menteri pasal IR4.0 nyengkaum nengkebang digital.

“Kami deka mai raban bansa Dayak bukai ngelala enggau nemu pemesai guna penau nengkebang digital enggau ngiri penemu sereta ngemeranka IR4.0 ba pengidup sida,” ku iya nambah.

Gary bejaku munyi nya lebuh ditanya pemberita pengudah ngatur pejalai nemuai meri basa ngagai Abang Johari di Wisma Bapa Malaysia ditu tadi.

KENANG KAMI… Gary Ningkan (tiga kiba) begambar kenang enggau Abang Johari (empat kiba) lebuh nemuai meri basa ngagai iya di Wisma Bapa Malaysia ditu, tadi. Gambar Nadim Bokhari

Beserimbai enggau pejalai nya ku iya, sida bisi nerang ngagai Abang Johari pasal sapa bagi komiti ti baru dipadu mangku pengawa ba SDGA sereta rintai perambu aktiviti deka dipejalai udah tu.

“Kami mega bisi nerang nyemetak pasal kini kuing enggau tuju singkang serakup tu ngagai iya (Abang Johari).

“Ngambika nyemetak didinga, Abang Johari udah diterang pasal serakup ti nyadi pelasar rayat sedarka pemesai guna penemu enggau pelajar kelebih agi sida ke diau di menua pesisir.

“Tu nyengkaum bala kaban Dayak bukai dikaul rat enggau disukung ba mayuh bengkah sukut baka ngiga makit kereja ungkup raban graduet,”ku iya.

Nangkan nya, Gary madahka Abang Johari ngarapka sida ulih mansang maju, bekunsi penemu enggau meransang SDGA nyulut ke mua.

Tambah iya, Abang Johari deka ngiga palan ungkup serakup nya bejalaika aktiviti enggau program sida baka bengkel.

“Kami ngarapka SDGA meruan tegap.

“Kami sebuat mega udah setuju ngemudika serakup ngembuan penuduk belanja tegap agi ti meri pemaik ngagai Sarawak ukai semina bansa Dayak aja,” ku iya.

Sama datai Mandal Presiden SDGA Dr Jawing Chunggat disempulang bala komiti bukai.