SARATOK: Lumba ukai semina mai pengeregas enggau pengerai ba batang tubuh aja tang mega ari sukut runding.

Ku Kaban Parlimen Saratok Ali Biju, nengah lumba tu tubuh enggau runding kitai deka regas sereta ulih nempa komuniti ti ngemeranka gaya idup bepengerai.

“Enti tubuh gerai, kitai deka regas ngaduka semua pengawa lalu runding mega deka panjai agi kelebih agi pasal pekara pengidup besehari sehari.

“Nengah aktiviti baka tu mega kitai ulih nyimpul kaul kitai begulai enggau pangan diri ari disiplin, kaul kerejasama sereta pemereti ati,” ku Ali ti mega Kaban Kunsil Nengeri (Adun) Krian.

Ali diarika Sapit Ketuai PKR Pampang Saratok, William Barang mansutka jaku nya lebuh Bejadika Pengerami Lumba Sekula Primari (SK) Ulu Sebetan kena Hari Empat tu tadi.

BASA … Piak pengatur nyuaka tepa ngagai William ngarika Ali.

Ku Ali, iya berasai lantang ati meda pemanah kaul serakup enggau pengiruh kelebih agi bala komiti sekula ti udah dipadu gawa ngemujurka pengerami nya.

“Lumba tu ba penemu aku, pelasar kitai nerenak ulah ti beratka pengerai enggau pengeregas tubuh kelimpah nempa disiplin tinggi ngagai rebak baru berengkah ari umur biak.

“Nya kebuah aku nyukung pengawa diatur bala kita nengah agih belanja penyampau RM7000 lalu ngarapka saup aku tu ulih ngelempungka tating belanja kita ti ngatur sebarang pengawa jemah ti mai pemaik ngagai semua,” ku Ali madah nyemetak.

Lumba sekali tu mega disereta bala nembiak ari SK Sungai Nyiar, SK St Paul, SK Saint Micheal enggau SK Supok.

Sama datai pemantu khas iya, Glen Tulsa Anthony disempulang bala ari Palan Servis Komuniti Saratok, bala pengajar, apai indai enggau nembiak sereta bala bukai ngerichahka agi atur pengerami sehari nya.

NYUA PERAIS…Gleen (kiba) ngerasukka midul ngagai siku nembiak ke teulihka pemujur ba lumba nya.