Sida enda tau dipejal berubah laban idup ba kampung endang udah chara sida kenyau ari kelia

KUCHING: Daya idup bansa Penan patut diperati enggau dalam sebedau ngubah runding tauka pekara bukai ti bekaul enggau sida.

Pemungkal Gerempung Pengelantang Pendiau Pengadang Kuching tauka Hope Place Kelvin Wan, 37 taun madah, komuniti tu enda tau dipejal berubah laban idup diau ba kampung endang udah chara sida ngidupka diri kenyau ari kelia.

“Bansa Penan patut diperati baka ni sida berunding kelimpah ulah begulai enggau pangan diri sereta orang bukai.

“Iya ti ditemu aku, bansa tu (Penan) ngembuan tanggam kaul ti rat enggau diri sebilik, nya kebuah enti ulih sida enggai nikah enggau bansa bukai,” ku iya.

Kelvin bejaku munyi nya lebuh dirandau Suara Sarawak ba opis iya empu di Tabuan Tranquility apin lama.

NERANG PENGIDUP PENAN…Kelvin Wan lebuh dirandau Suara Sarawak ba opis iya empu di Tabuan Tranquility apin lama.

Iya madahka, kala nemuai ngagai kampung Penan ti agi ngaga rumah atas pun kayu.

“Maya aku nguji tama ngagai rumah nya, dia aku meda ruang rumah sida chukup mit.

“Dia aku nanya orang ke nguan rumah nya nama kebuah ngaga rumah mit.

“Iya nyaut aku muntang ‘kami tubuh enam iku enti tinduk rumah tu umbas endur gali, nama kebuah deka ngaga rumah besai?” ku iya.

Dia Kelvin ngasaika runding bansa tu agi bedau nyemetak berubah taja menua udah mansang.

Pia mega, lebuh iya nemuai ngagai sebuah kampung Penan di Apau Nyaring enggau Long Liaw apin lama tepedaka perengka dikena nembiak belajar balat ngenyinu ati, semua enda chukup.

“Rumah panjai 43 pintu nya endang 100 peratus diuan bansa Penan.

“Bisi nembiak enda ulih besekula laban apai indai enggai jauh ari anak.

“Nya kebuah, sida serumah ngambi inisiatif ngajar nembiak ti enda besekula nya macha enggau nulis ari nembiak ti baru abis besekula Pom Lima, tang perengka dikena sida belajar amat kurang,” ku iya.

Iya enggau raban bukai maya nya datai mai bantu perengka pemakai baka berau, mi, gula, minyak makai enggau ke bukai madah sida mega kala ngusung sebuah agi kampung Penan di Long Selulung.

“Maya nya gerempung aku dibantu Kelab 4×4 Bintulu mai bantu barang pemakai sepemerat 10 tan ti beungkus RM500 ribu.

“Kami datai nuju kampung nya kira dua hari pejalai ngena 15 buah kerita 4×4.

“Laban pengidup sida endang bumai sereta ngiga jelu babas, nya kebuah sida mayuh enda nemu ngereja pengawa bukai tauka semina nganti dibantu,” ku iya.

Nangkan nya, Kelvin madah ba ujung taun tu gerempung iya deka nemuai baru mantu peranak Kampung Apau Nyaring enggau Long Liaw perengka belajar baka papan burak, mija enggau bangku dikena sida.

“Tu program tanggungpengawa rama koporat (CSR) Izusu Malaysia ti beungkus RM10,000.

“Kelimpah meri bantu pasal pekara belajar nembiak ba kampung nya, dia kami mega deka nyadung barang guna ungkup bala sida ke indu.

“Tu beguna laban, kami deka ngajar sida nyaga pemeresi diri lebuh datai bulan kelebih agi ngagai indu ti baru udah beranak,” ku iya.