KUCHING: Bansa Penan patut mayuh agi diambi gawa ba opis perintah taja bansa tu minoriti di Sarawak.

Siku anak Penan ti mega Pemesai Pengereja Pengawa ba Opis Residen Miri Ezra Uda, 42 taun madah nyema perintah deka ngubah runding sereta gaya pengidup Penan, sida patut ngasuh anak Penan empu ngambi megai tanggungpengawa nya.

“Sapa agi ulih ngubah runding bansa Penan enti ukai anak Penan empu ti napi pemerinsa ngiga pemandai sekula.

“Anak Penan empu patut mayuh agi diberi peluang gawa enggau opis perintah dikena nyadi teladan ngagai sida ti bukai asil pemandai besekula,” ku iya.

Ezra bejaku munyi nya lebuh dirandau Suara Sarawak apin lama.

Ezra Uda

Ku iya, mayuh apai indai bansa Penan enda meda asil nganjung anak besekula laban pengudah tembu besekula anak sida lalu enda bulih pengawa manah.

“Runding ti baka tu patut diubah, perintah patut mantu bansa kami ngiga jalai bulihka pengawa manah ngambika apai indai enda asa.

“Sekeda sida irau nganjung anak besekula nangika enda mujur lalu anak nya mega enda nemu gawa ba kampung ti mai pengerugi.

“Aku ngarapka perintah ngaga tim bansa Penan kelebih agi nembiak baru gawa ba opis perintah laban ba Ulu Baram urung 25 iku nembiak Penan udah mujur ngambi sekula ba tikas Degree,” ku iya.

Pia mega, iya meri pengaga ati ngagai perintah laban enda ngenaka bayar bala nembiak Penan ti besekula ba sekula primary.

“Taja pia, enti ulih aku ngarapka perintah ulih mantu mayuh agi pekara bukai baka mantu tambang maya kemisi sekula ngambika anak Penan ulih pulai nemuai ngagai apai indai sida di menua.

“Agih belanja ti diberi perintah ngagai bansa Penan endang bisi baka Program Palan Servis Menua Pesisir dikena ngubah pendiau peranak Penan, tang pejalai ngenataika bantu nya mayuh enda datai nuju Penan empu.

“Kebuah pia laban pengereja pengawa enda chukup enggau agih nya mayuh midang nuju orang bukai,” ku iya.

Dia Ezra ngarapka nyema agih ti diberi perintah diatur sereta dipejalai Bansa Penan empu, pekara nya nyadi malin ngagai apai indai Penan ngemeratka pekara pelajar laban bisi ulih meda chunto.

Tambah iya, penyedar pasal guna pelajar ba pengidup bansa Penan endang udah bisi tang agi lubah diterima.

“Aku ngarapka bansa Penan ulih ngatika diri nengah pemansang jeman diatu lalu ulih muka runding ba pekara belajar, betanam betupi, dagang enggau ke bukai.

“Sida patut bisi visyen ngambi enda ngaul diri ba pekara ti enda manah lalu mantu bansa diri empu mansang ke mua,” ku iya ngujungka randau.