SRI AMAN: Pemutus Kepala Menteri ti numbuhka Opis Menteri Infrastruktur enggau Pemansang Penyangkai Kapal ke diiring Tan Sri Dr James Jemut Masing endang bepelasarka Sempekat Malaysia 1963 (MA63).

Datuk Patinggi Abang Johari Tun Openg madah, pengawa ngemansangka penyangkai kapal nya endang hak kitai Sarawak.

“Genap nengeri tauka menua ngembuan dagang eksport enggau import ungkup pemaik ekonomi.

“Nya alai, aku ngubah portfolio ba tusun Kabinet Sarawak iya nya nambahka pemansang penyangkai kapal,” ku iya rambau Pengerami Bejadika Roadshow GPS Zon Enam ba Pasar Lachau ditu, kemari.

Kenu ku Abang Johari ke mega Chairman GPS, nengah hak tu, Sarawak ulih nangkir penyangkai kapal ke bisi diatu dikena ngerembaika dagang dalam menua enggau entarabansa.

BEJADI…Abang Johari ngitau tambai GPS begulai enggau bala bukai rambau bejadika Roadshow GPS Zon Enam di Pasar Lachau ditu, kemari.

“Bisi orang deka ngambi penyangkai kapal kitai mimit-mimit.

“Tang, kitai GPS ukai tambap nyentuk enda nemu hak diri dalam MA63,” ku iya.

Ku iya, atur mindahka indu mengeri menua Indonesia ari Jakarta ke Kalimantan Timur deka muka peluang ke lebih besai ngagai industri pengawa dagang di Sarawak.

Nya alai, ku iya, perengka guna penyangkai kapal patut dikemanah nyengkaum jalai raya enggau jalai tebing pantai ke diatur dipejalaika perintah Sarawak.

Berebak enggau nya, Abang Johari madah diri berasai enda liat ati meda parti ke dilaban bedanji deka ngelancharka “perang” ba Sarawak manggai pengawa bepilih besai nengeri deka datai.

“Enti orang deka ‘beperang’ enggau kitai, kitai patut ngelaban baru.

“Nya kebuah, kitai bisi ngatur sekeda ubah nyengkaum nyiri kaunselor ari sida ke nembiak,”ku iya.

Taja pia, ku iya beduduk ari polisi nya, bisi piak enda lantang ati lalu ngemaduka diri ari pangku pengawa.

Dulu ari tu, Presiden Parti Sarawak Bersatu (PSB), Datuk Sri Wong Soon Koh ngemaduka diri mangku penuduk Menteri Wang Kedua laban nadai sebarang kaunselor ari bala kaban parti sida.

PSB diarika kaban parti ke udah pansut ari SUPP iya nya parti ke diiring Menteri Kaunsil Kandang Menua enggau Pengawa Berumah, Datuk Dr. Sim Kui Hian.