MIRI: Program Jual Terus ari Ladang (JTDL) enggau Industri Pengawa Bumai diatur Kaunsil Makit Betanam Betupi Perintah Besai (Fama) mayuh mantu bala pedaja sereta pengereja ke bekaul enggau pengawa nya.

Menijar Permata Bumi Enterprise Rusaimah Sani madah tu kelebih agi dipeda ari sukut ngelakuka produk sida.

“Sida (Fama) chukup mayuh mantu kami ngelakuka produk ngagai mensia mayuh lalu ngerembaika makit produk kami.

“Produk aku diatu udah bisi di Bintulu, Sibu, Sarikei enggau Kuching lalu diatu aku benung nganti saut ari kaban dagang ari Sabah,” ku iya madah enggau gaga kemari.

Rusaimah madah munyi nya lebuh dirandau Suara Sarawak ba pengerami Jual Terus ari Ladang (JTDL) & Industri Pengawa Bumai (IAT)di Bintang Megamall ditu, kemari.

TERIMA KASIH FAMA…Menijar Permata Bumi Enterprise Rusaimah Sani mandangka produk ke dijual iya nyerumba program JDTL 2019. FOTO: GHAZALI BUJANG

Pengerami ti diatur berengkah ari 23 Ogos tu tadi mayuh mansutka produk mata ari ladang enggau produk ba baruh IAT.

Berebak enggau nya ku iya, halwa ikan guntin dijual iya laku 300 bungkus ba hari keterubah pengerami JTDL & Industri Asas Tani.

Ku iya, ba hari kepenudi (kemari), produk ti pemadu laku dibeli mensia mayuh iya nya snek ikan guntin.

“Aku benung nganti stok ikan guntin ke baru datai, laban aku ngandalka ba hari kepenudi tu semua stok ke bisi nya abis dijual magang.

“Bisi tiga asai snek ikan guntin tu iya nya sira, sambal enggau samboi, lalu tu laku laban dijual enggau rega RM2.50 sebungkus,” ku iya.