KUCHING: LONGi (Kuching) Sdn Bhd enggau LONGi Technology (Kuching) Sdn Bhd mujur beranakka puku penyampau RM200 juta dalam timpuh tiga taun.

Sapit Kepala Menteri ti mega Menteri Dagang Entarabansa enggau Industri, Terminal enggau Pemansang Orang Dagang Datuk Amar Awang Tengah Ali Hasan madahka pemujur dagang serikat tu udah nyendiaka mayuh pengawa puang ngagai rayat Sarawak.

“LONGi iya nya sebuah serikat majak mansang mansutka produk panel solar.

“Sida diatu ngaji 3,800 pengereja seraya 700 ari nya bisi degree enggau diploma,” ku iya.

Awang bejaku munyi nya lebuh dirandau pemberita lebuh mai raban diligit ari menua Brunei Darussalam ngelawa LONGi (Kuching) Sdn Bhd ditu, kemari.

PENGINGAT… Ngieng Sii Jing (dua kiba) nyuaka tepa ngagai pengari diligi ari Brunei Darussalam ba pejalai ngelawa LONGi kemari seraya dikemata Awang Tengah (kiba).

Ba lansa bukai, Ketuai Pemesai Eksekutif LONGi Ngieng Sii Jing madahka taun tu sida udah nyapai penyampau puku diperanak manggai RM1.6 juta.

“Puku diperanak taun tu udah manggai RM1.6 juta, ditambah enggau LONGi Technology urung RM500 juta.

“Nya alai, kandang tiga taun tu kami mujur beranakka puku penyampau RM200 juta,” ku iya.

Ku Sii Jing, ba taun ti deka datai sida ngandalka urung 4,100 pengereja ari menua tu empu gawa dia.

“Ujung taun tu, kami bisi 3,800 pengereja lalu ba taun deka datai kami andal amat nerima 4,100 pengereja baru.

“Kami mega merambu ngaga sebuah agi kilang baru ti begunaka 800 pengereja baru.

“Nya alai, barang sapa bisi bakih tauka kaban benung begigaka pengawa, anang enggai bepadah sereta minta sida ngerebut peluang gawa ba LONGi,” ku iya meri peransang.

Ku iya, semua pengereja digiga serikat sida endang peranak menua Malaysia empu kelebih agi peranak Sarawak.

Diligit ari Brunei ti datai ngelawa LONGi kemari iya nya Menteri ba Opis Kepala Menteri ti mega Menteri Wang enggau Ekonomi II Datuk Seri Setia Dr Amin Liew Abdullah, Menteri Pekara Luar Nengeri II Datuk Seri Setia Erywan Pehin Datu Pekerma Jaya Mohd Yusof, Pemangku Mandal Direktor Awang Aizul Sorfin Datuk Paduka Abdul Aziz enggau bala bukai.

Sama datai Menteri Muda Dagang Entarabansa enggau Industri, Terminal enggau Pemansang Orang Dagang Datuk Mohd Naroden Majais enggau Malcolm Mussen Lamoh.