KUCHING: Chukai jalai entukar 2,000cc enggau besai agi semina ulih dikemaru ba Opis Perengka Pengangkut Darat (JPJ) aja, berengkah diterit pagila, 1 September.

Direktor JPJ Sarawak Mohamad Syafiq Anas Abdullah madahka pekara nya udah dituku berindik ari pemutus perintah sentang bekaul enggau pekara nya apin lama ke udah.

“Kitai nganti Menteri Perengka Pengangkut Anthony Loke Siew Fook ngeluarka penerang pasal pekara tu kandang sehari dua tu.

“Naka diatu, aku enda ulih mantaika penerang silik agi.

“Piak Pos Malaysia enggau bakih dagang kitai udah dipadah pasal pemutus perintah ke alai pengawa ngemaruka chukai jalai entukar dagang enggau peribit 2,000cc enggau besai agi diadu ba opis JPJ aja,” ku iya.

Iya mansutka jaku nya lebuh randau pemberita ba program Konvoi Merdeka Ride RTD Sarawak 2019 beserimbai enggau ngintu Pengerami Hari Kebangsaan 2019 ba laman Indu Opis JPJ ditu tadi.