Ali naka ulih mantu SMK Saratok

SARATOK: Kaban Parlimen Saratok Ali Biju naka ulih mantu ngemanah sekula ke alai iya ngulihka pemanadai iya nya SMK Saratok.

Kenu ku iya, endang udah nyadi juluk aku deka mai ubah ngagai sekula lama aku suba (SMK Saratok) awakka nembiak ti belajar ditu enda ngasaika pemedis baka kami suba.

“Endang udah nyadi juluk aku deka mai ubah ngagai sekula lama aku suba (SMK Saratok) awakka nembiak ti belajar ditu enda ngasaika pemedis baka kami suba,”ku iya.

Iya madah munyi nya rambau pejalai nemuai ngabas perengkaguna ba SMK Saratok, apin lama ke udah.

Asil ari pejalai nya, dia iya madah perengkaguna ke balat rusak di sekula nya deka dikemanah ngena chara berengkat.

BISI BERUBAH…Ali disempulang pemantu peribit iya (Kanan sekali), Glenn, Tinggom (dua kanan) Phillip Singkek (empat kanan) enggau bala bukai rambau ngabas SMK Saratok, apin lama ke udah.

Ba renggat keterubah, dia SMK Saratok deka nerima bantu 60 iti katil, tilam (120 iti) enggau jemari gari (120 iti).

“Gaga sereta temegah asai ati laban udah mujur ngamat semaiya diri iya nya mantu sekula tu, kelebih agi ari sukut perengkaguna bala nembiak.

“Bantu ari aku tu diberi nitihka penyampau belanja ari perintah besai ngagai sitak ke dipegai aku,” ku iya.

Dulu ari tu, SMK Saratok bisi nerima bantu RM100, 000 ari Kaban Kunsil Nengeri (Adun) Krian nya.

Nya alai, Ali ngarapka bala apai indai nembiak chakah agi meransang bala anak nurun sekula laban perengkaguna udah menyana.

Ungkup penemu, SMK Saratok entata sekula ke pemadu tuai ba pelilih Saratok lalu mayuh nempa nembiak sekula ti nyulut ba pelajar.

Sama datai Prinsipal SMK Saratok Philip Singkek, PK Hem Tinggom Jelemin enggau bala bukai.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak