Bersatu sepenemu Dr M nampung pengawa

“Dikena ngetanka penegap ekonomi, politik enggau pengidup rama, rayat Malaysia kelebih agi rayat Sarawak tu empu agi randakka ketuai dipegai Tun Dr Mahathir Mohamad.” – Jaziri Alkaf.

KUCHING: Bersatu Sarawak dekaka timpuh pangku pengawa Menteri Besai Malaysia Tun Dr Mahathir Mohamad ditampung dataika abis pengggal.

Sida mega madahka diri sepenemu lalu setujuka perambu nya enggau nadai bechiping penemu bala bukai.

“Bekalih kuasa Menteri Besai enda patut dipejalai enggau berumban kelebih agi maya menua deka napi Pengawa Bepilih Nengeri (PRN) Sarawak.

“PRN tu dipelaba dipejalai abis tumu ba taun baru lalu kitai patut nyendiaka diri ari semua sukut nentuka juluk gempung parti Pakatan Harapa ulih dijapai,” ku Sekretari Besai Interim Bersatu Sarawak Jaziri Alkaf Suffian.

SUKUNG TEGUT… Jaziri Alkaf Suffian (dua kiba) ngempung penemu ti setujuka perambu Menteri Besai Tun Dr Mahathir ditampung dataika abis penggal.

Pia mega ku Jaziri, Bersatu Sarawak ngarap chara gawa bekunsika pengelantang ti ditibak ari penemu Tun Dr Mahathir patut diterenak ngagai genap serak komuniti.

“Pekara tu enda patut semina diperati ari sukut bekunsika asil menua aja tang patut panjai agi runding, jauh agi tinjau ke mua.

“Bekunsika pengelantang tu deka meri pemaik ukai semina ngagai pemansang serap menua aja, tang nentuka tunga kuing rebak dudi ngemai nama menua gah ba mata dunya,” ku iya madah nyemetak.

Nya alai ku iya, dikena ngetanka penegap ekonomi, politik enggau pengidup rama, rayat Malaysia kelebih agi rayat Sarawak tu empu agi randakka ketuai dipegai Tun Dr Mahathir Mohamad.

Agi tubah peminta enggau peneka rayat apin ditangkup taja udah 50 lebih taun Malaysia ditumbuh ngena nama Sempekat Malaysia 1963 (MA63).

“Gempung Parti Sarawak (GPS) patut fokus agi ngagai pekara menua tu baka penanggul tanah adat bansa asal ti agi nekul rayat Sarawak kenyau ari bepuluh taun ke udah.

“Perintah Besai mega bisi pangku pengawa besai gawaka rayat Sarawak lalu tuju pengawa tu enda patut dikelese Perintah Sarawak,” ku Jaziri nandu.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak