Semua gerempung meseti berejista

KUCHING: Semua gerempung ti ngatur sebarang pengawa meseti berejister nengah Opis Pengerejister Gerempung Malaysia (JPPM).

Ketuai Direktor Opis Pengerejister Gerempung Malaysia (JPPM) Masyati Abang Ibrahim madah nitihka Akta Pertubuhan 1966 gerempung ti deka bejalaika tanggungpengawa meseti ngerejister diri nengah JPPM.

“Enti sida nadai ngerejister, gerempung nya enda tau ngatur pengawa.

“Sida patut nitihka undang-undang ti udah diletak, nyema sida enda nitihka atur ti udah ditetapka kami deka neritka atur”,ku iya.

Masyati bejaku munyi nya ngagai pemberita ba Pengerami Ros-Care Jelajah Hiper’19 Zon Borneo Sarawak Bumi Kenyalang ba sebuah palan bebeli barang Petra Jaya ditu, kemari.

TERIMA KASIH…Masyati (lima kanan) nerima tepa ari Geogina Ngau pengudah tembu pengawa nya, tadi.

Ku iya, sida endang bisi nerima kompelin pasal gerempung enda berejister lalu bisi ngatur pengawa tauka program.

“Kami bisi nerima kompelin, dia kami madahka nyema sida deka ngaga pengawa nengah sebuah gerempung, sida patut ngerejister nengah JPPM.

“Enti enda pia, gerempung nya dikumbai ngatur pengawa nadai pemendar,” ku iya.

Kelimpah ari nya, iya madah di Sarawak mayuh gerempung ti bejalaika pengawa endang berejister nengah JPPM.

“Nyema kami bisi tetemuka sida ti nadai ngerejister, kami terus nankan sida awakka ngerejister diri.

“Laban deka ngatur sebarang aktiviti gerempung di menua tu, sida patut ngerejister diri dulu,” ku iya.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak