KUCHING: Ngajat endang udah nyadi identiti bansa Iban lalu patut diintu enggau manah.

Beduduk ari nya, bisi 17 iku anak mit ari Kampung Sungai Laru mujur nerima setipikit tembu kelas ngajat sida, ensanus.

Sida anak mit ti enggau kelas tu berumur antara 7 ngagai 12 taun lalu dipatih pengajar ti mega siku ari komiti Biro Main Asal, Cecelia Bantin.

Pengawa nya dipenyadika Ketuai Pemuda Batu Lintang, Datuk Safri Abdillah.

Nitihka penerang, ngajat sebagi ari adat ke pemadu beguna ba bansa Iban ukai semina dipandangka ba pengerami Hari Gawai tang mega dikena nerima penatai temuai lebuh bisi pengerami.

Nya alai, endang patut enti sema ngajat tu diintu semua komuniti Iban kelebih agi bala rebak baru.

Pengawa meri setipikit nya mega diatur beserimbai enggau pengerami Hari Kemerdekaan enggau Tamat Ngajat di Panggau Tebuka Kampung Sungai Laru, ditu.

Kelimpah ari nya, kelas ngajat nya siti ari aktiviti ti diatur Biro Main Asal Komiti Pemansang Indu Kampung Sungai Laru.

Kelas ngajat nya dipejalai sepengelama enam bulan berengkah ari 2 Februari lalu tembu 30 Ogos tu tadi.

Sama bela diatur malam nya iya nya pengerami ngintu Hari Kemerdekaan 31 Ogos sereta pekit mandangka baju ari chura menira Malaysia.

KREATIF… Penyereta pekit mandangka pekayan ditempa bepelasarka Jalur Gemilang rambau pengerami Hari Kemerdekaan enggau Tamat Ngajat ditu, ensanus.