SARATOK: Mayuh macham chara tau dikena kitai nambah pemisi ruang bilik diri empu, asal enda berat tulang ngereja pengawa.

Siku pedaja ditu, Benya anak Jugi 45 , ari Selambong madah munyi nya lebuh dirandau suara sarawak ba Tamu Saratok, apin lama ke udah.

“Lima taun aku udah bejual mayuh macham sayur babas, buah kampung, limau, pisang enggau mayuh macham sayur bukai ba tamu Saratok ditu.

“Bedagang ba tamu mega nerima sambut ke chukup manah ari temuai ti datai ngelawa palan deditu laban rega ditu engkeman enda mar,”ku Benya seraya madah diri kala bulih untung manggai RM2000 sebulan asil ari bejual ba palan tamu nya.

Nangkan nya, Benya ke mega bini siku pengajar ditu lalu bisi anak empat iku ngansak nembiak rebak baru diatu anang sanggu ngereja sebarang pengawa dagang kelimpah ari kitai ngereja pengawa bukai.

“Aku mega besai pengarap ngagai ejensi perintah bekaul ulih nyeleti perengka guna ba tamu ditu ngambi pulai ke pengelantang ngagai bala orang bedaja ditu,

“Perengka guna baka mija alai engkah barang ke dijual sigi patut digaga ungkup kami ditu”,tandu ia baru.

Tamu Saratok patut dikemanah agi

 

BEMACHAM SAYUR…Gaya Tamu Saratok ti bisi nyual bemacham sayur ninting hari.