KUCHING: Peragam ti enda manah pasal penyakit lan ba mensia mayuh patut diubah ngambika enda meri empas negatif ngagai peturun orang ti kala ditepan penyakit nya.

Presiden Gerempung Pesaka Sepital RCBM Angelina Jong madahka mensia mayuh diatu agi dikelingi runding penyakit lan ti tau ngasuh sida ti kala ditepan penyakit lan enggau peturun sida enda lantang ati.

“Kelia sida pechaya penyakit tu sebagi ari sumpah ketegal orang nya ngereja penyalah tauka ulah ti enda menuku.

“Taja pia, kebendar penyakit tu dikelala ba taun 1873 sebengkah penyakit ngerekai ari bakteria ti ulih dipeda ba jari enggau mua,” ku iya.

Iya bejaku munyi nya ngagai pemberita pengudah ngelawa sebuah rumah ini tuai iya nya Dinit Banying di Kampung Sinar Baru iya nya sebuah kampung rehibilitasyen penyakit lan ditu, ensana.

Angelina Jong

Tambah iya, sebagi ari peranak kampung agi ngasai enda lantang ati betemu enggau mensia mayuh laban kala ditepan penyakit lan ketegal mensia mayuh ti enda nerima pengurang sida.

“Anak sida ti kala ditepan penyakit lan tu kala nusi ke aku sida nadai bakih nyentukka sekeda sida ditikau enggau batu laban peragam orang luar ti agi negatif ngagai penyakit nya.

“Nya alai, besai amai pengarap aku ngambika komuniti bisi penyedar penyakit lan tu ulih diubat nyentukka gerai sereta anang meragam pekara enda manah pasal anak sida,” ku iya.

Iya madahka, diatu sida ti ditepan penyakit lan udah diberi berubat luar laban ubat jeman diatu udah manah lalu enda ngurung bala pesakit lan di sepital baka kelia.

“Bisi 17 iku pesakit udah gerai dipindahka ngagai kampung tu ngambika sida ulih begulai enggau komuniti lalu idup baka orang bukai.

“Nya alai, mensia mayuh patut sama besukung mantu ngambika ngerapat kaul lalu ngubah runding ti enda manah ngagai penyakit lan,” ku iya.

Nitihka penerang Angelina penyakit lan tu sebengkah penyakit ngerekai ari bakteria sebaka baka rengga enggau penyakit tibi, tang penyakit tu ulih ngerekai ngagai urat, tulang enggau lapis mukrosa dataika ngachau pejalai darah dalam tubuh mensia.

Ku iya mega, penyakit tu tau ngasuh jari ditetak tauka puntul laban urat mati sereta ngasuh buta ketegal lapis mukrosa mua buruk.