KUCHING: Sarawak endang patut bisi ngembuan raban pengelikun diri empu lalu ngidupka baru tim Sarawak Rangers dikena nyaup nyaga garis entara menua.

Ketuai Nembiak Parti Sa’Ati Rayat Sarawak (SUPP) Michael Tiang madah iya nyukung penemu Kaban Parlimen Santubong Datuk Seri Wan Junaidi ngambika Sarawak ngembuan raban pengelikun diri empu.

“Kitai endang patut bisi raban pengelikun sereta ngidupka baru raban Sarawak Rangers dikena nyaga pengelikun ba garis entara menua.

“Nitihka Pekara 5 Sempekat Malaysia 1963, Sarawak diberi kuasa ngatur pengawa bekaul orang pansut tauka tama ngagai Sarawak,” ku iya.

Tiang madah munyi nya nengah sebengkah penerang kemari.

Michael Tiang

Ku iya, kuasa tu beguna amat beguna ngagai Sarawak ngambika Direktor Imigresen Nengeri enggau pemesai ti diberi tanggungpengawa nyaga penatai orang luar ba garis entara menua dipilih ari anak Sarawak empu.

“Kebuah pia laban anak Sarawak bisi ngembuan integriti dalam nyaga garis entara menua ditu.

“Nyaga garis entara menua tu deka meri pangka ngagai aktiviti tama enggau nadai pemendar orang ari menua luar ngagai Sarawak enti Sarawak nadai bisi ngembuan raban pengelikun ti khas nyaga pekara tu,” ku iya.

Tandu iya, nyema pengawa tu dipegai orang bukai nyadi tu pekara ke enda patut.

“Kitai enda ulih ngarapka orang bukai nyaga menua tu. Nya sempama baka orang ti ngempu sebuah rumah, tang semina ulih nyaga pintu tama aja tang enda ulih nyaga pagar tama laban pengawa nya digaga orang bukai,” ku iya.

Nya kebuah ku iya, pengelandik enggau pemerani anak Sarawak ti kala gawa ba Sarawak Rangers patut nyadika malin nyaga garis entara menua di Sarawak.

Nangkan nya, arapka Raban Sarawak Rangers ulih diidupka baru dikena negapka agi pengelikun garis entara menua baka tama enggau nadai pemendar sereta penyakit ti ngerekai ti dibai ke Sarawak.

“Nya mega dikena nyekat penatai ukui ari Kalimantan (bekaul penyadi rabies) nyadi manah agi kitai meseti bisi tim penyaga pengelikun nyaga adan ba garis entara menua kitai empu!” ku iya.

Sarawak Rangers ditumbuhka Rajah Charles Brooke iya nya Rajah Sarawak ti ke-2 kena Oktober 1862 lalu dikinsil ba taun 1963.