KUCHING: Projek Solution for Life dikeandal ulih mantu raban seranta kelimpah meransang pengawa nyaga pemeresi rampa menua sereta nerenak ulah ngena baru.

Menteri Kaunsil Kandang Menua enggau Pengawa Berumah Datuk Prof Sim Kui Hian madah, tu sebagi ari chara kitai meri sukung ngagai projek ti mai pemaik ngagai raban diselinting seraya ngetanka pengeraja asal, pengelain utai tumbuh enggau utai idup.

“Pengawa tu beguna amat ngambika kitai seruran ulih ngasaika angin ti beresi enggau pengeraja asal sereta rampa menua diintu meruan pulaika pengerai semua kitai.

“Taja kitai ranchak nyungkak ekonomi menua, tang pemeresi rampa menua patut seruran dikemerat nentuka rebak dudi bela ngasaika pemaik tu,” ku iya.

Teks jaku iya dibacha Menteri Muda Dagang Temuai, Seni enggau Main Asal Datuk Sebastian Ting Chiew Yew ba pengawa bejadika Projek Solution for Life ba sebuah hotel tebilang ditu tadi.

Penemu iya disukung Presiden Hope Place Chong Hai Eng ti madahka Projek Solution for Life tu nipakka juluk sida deka ngenegap ekonomi ruang bilik seranta.

“Ba projek tu, kami ukai semina meransang ulah ngena baru sabun ngambika ulih diberi ngagai raban diselinting aja tang mantu nyungkak ekonomi sida sebilik lalu ulih munaska penyeranta.

“Kami ngarapka sida pintar runding enggau bedaya ngiga belanja kediri empu ari bejualka sabun ke diberi kami ari projek tu,” ku iya.

NGAGA SABUN… Sebastian (tiga kiba) disempulang bala bukai ngujika pengelandik diri ngaga sabun ke udah dikena nyadi sabun ke baru, ditu tadi.