SARATOK: Kaban Kunsil Nengeri (Adun) Krian Ali Biju minta piak Salcra nerang ngagai penyereta bekaul kes nangkap tiga iku pemesai opis nya nyengkaum siku orang dagang, apin lama ke udah.

Dulu agi ari tu, nengah sebengkah penerang Ali madah diri tekenyit ninga berita bekaul pengawa SPRM ngetan tiga iku pemesai opis Salcra nyengkaum siku orang dagang ari media rama, ensana.

“Berita enda disadang, lalu pengawa SPRM tu dikearap tau nyerungkai tanda tanya bekaul atur pengawa, operasyen enggau pengawa Salcra.

Sitak menua ke mayuh endur Salcra iya nya Lubok Antu, Sri Aman, Betong, Saratok, Serian, Bau enggau Lundu.
“Anang enda ingat, Salcra siti chunto pelin pemansang pemadu engkeman dikena nyungkak penatai pemisi peranak menua pesisir lebih agi bansa Dayak ngelama tu.

“Taja pia, enti pelin pemansang digaga ngena nengah jalai salah, pia mega nadai meri penguntung, dia Salcra patut nerangka pekara tu,” ku Ali.

Kaban Parlimen Saratok nya mega madah, urung 20, 000 peranak Dayak ari selampur ke mungkur tanah urung 50, 000 hektar NCRL/TNL ari Lundu nyentuk ke Kabong bisi kaul enggau bemacham skim Salcra kenyau bepuluh taun ke udah.

Nya alai, aku deka ninga penerang silik ari Chairman Salcra ke mega Menteri Betanam Betupi, Tanah Asal enggau Pemansang Kandang Menua Datuk Amar Douglas Uggah Embas.

Iya ke mega Mandal Presiden Keadilan (PKR) madah munyi nya nengah sebengkah penerang, ensana.
Nangkan nya, Ali madah Salcra endang bisi ngatur kunterik bejuta ringgit dikena nyendiaka rachun indu utai enggau baja ungkup selampur Sarawa.

Bisi mega kunterik ngemataka jalai alun, perengkaguna enggau kereban penangkut berega beratus juta.

Kati pengawa nangkap tu bisi kaul? Ku tanya iya seraya ngerintaika sekeda tanya bukai ke bekaul.
Berebak enggau nya, Ali ngarapka SPRM terus chakah mansik ‘raja’ Yu ke benung lantang ati lepau dedin lalu ukai semina mansik ‘ikan besai’ ditu.

ALI BIJU