BETONG: Pengawa belajar lemai pengelama tiga jam ba rumah lalu apai indai nentuka semua kereja sekula tembu entara resipi sekeda nembiak Sekula Primari (SK) Nanga Ajau nyapai penyulut ba peresa UPSR taun tu.

Suara Sarawak ngelimpangka awak ngusung sekula nya ngambi mendingka penerang bala nembiak peresa UPSR subjek Matematik, ditu ensanus.

Siku nembiak peresa UPSR ba sekula nya, Ruiencabella Elma Syderak madahka diri nagit bulih 6A ba UPSR taun tu.
Anak pengajar enggau pemesai bomba nya madahka iya mayuh berandau tauka belajar enggau bala bakih iya sebedau peresa UPSR nya.

“Kami suah belajar beraban ngambi ulih bekunsika penemu lalu enti ba rumah aku deka netap tiga jam belajar ninting hari mua ke lemai baka macha bup, belajar enggau ngiga penemu bukai ba internet enggau belela maya malam,” ku Elma.

Dirandau pasal peresa keterubah UPSR kemari iya nya Matematik, Elma madahka diri berasai andal ulih bulih pemutus peresa pemadu manah.

KENANG… Fadreen Jingan begambar kenang enggau bala nembiak ke ngambi peresa UPSR.

Nambahka nya, Emerald Kumang Abigail Enteri ari Samu, Paku madahka diri besedia baka nembiak bukai.
“Indai aku chukup beratka pekara pelajar taja nadai kereja laban tiap malam iya deka meresa enggau nentuka semua kereja rumah aku udah tembu magang.

“Pengawa tu ngujungka aku nyulut ba peresa lalu tu patut ditemegah lalu aku beterima kasih laban bisi apai indai ti beratka pekara pelajar,” ku Emerald.

Iya mega meri terima kasih ngagai bala pengajar ti udah ngiri penemu ngagai iya ngelama tu.
Nangkan nya, Clayracia Maria Cosmas ari Meribong Layar meri terima kasih ngagai piak sekula laban mayuh ngatur program napi peresa UPSR.

“Aku berasai puas ati enggau chara ngajar enggau belajar (PdP) diatur piak sekula laban sida mantu kami sebedau napi peresa.

“Aku ngarapka ulih bulih 5A ba UPSR taja aku ngasaika subjek Matematik mar dipelajar,” ku iya seraya madahka juluk diri deka nyadi lutur.

Nur Fazreena Barji ke baru Primari Dua madahka diri rinduka belajar ngena gajet.

“Aku jarang belajar ngena bup tang rindu agi belajar enggau ngiga penemu baru ba komputer tauka telefon binching,” ku iya nerang.

Kepala Pengajar Fadreen Jingan Beriak nagit nambahka nembiak ulih nguasa pekara dibelajar (MTM) sida.

“Taja tu ukai pengawa muntang dikereja tang aku andalka pengeransing pengajar ngelama tu.

“Aku nagit bulih pemutus 6A pengudah ngena format ke baru beberapa taun ke udah.

“Taun tu, taun keempat ngena format ke baru nyangka ulih dikena bala nembiak.

“Nya alai, kitai nagit tiga nembiak deka nyapai juluk bulih pemutus 6A ba UPSR,” ku iya.

Nambahka nya ku iya, iya muji bala apai indai enggau Adun Layar Gerald Rentap Jabu laban udah meri sukung tegut ba semua pengawa dikereja piak sekula.

Iya mega madahka Rentap mantu nyendiaka bup malin ngagai chalun UPSR ba semua subjek.

Piak iya ngarapka ulih ngiri penemu ngagai bala nembiak ngambi ulih meri pemaik ngagai sida enggau sekula nya.