“Enti ulih, anang ngereja mayuh aktiviti rambau sebun nyadi lalu patut milih palan baka rumah tauka premis alai ngatur pengawa.”

KUCHING: Mensia mayuh dilalau ngurangka aktiviti ba luar rumah beduduk ari gaya hari besebun ba Sarawak diatu.

Menteri Pengerai Datuk Seri Dr Dzulkefly Ahmad ngelalau mensia mayuh enda kelalu mayuh ngereja pengawa ba luar rumah diatu.

“Bekaul enggau pejalai pengawa kitai sehari tu, kami udah besedia, lalu kami mega bejaga sereta enda ngarapka ujan ulih ngurangka sebun tu.

“Enti ulih, anang ngereja mayuh aktiviti rambau sebun nyadi lalu patut milih palan baka rumah tauka premis alai ngatur pengawa,” ku iya.

Datuk Seri Dr Dzulkefly Ahmad

Dzulkefly madah munyi nya lebuh dirandau pemberita pengudah bejadika Stop Stigma Run 2019 ba luar Begunan Dun Lama ditu, kemari.

Nangkan nya ku iya, mensia mayuh mega dilalau ngirup ai putih ngambika pengerai seruran dijaga.

“Ngagai sida ti ngembuan penyakit kronik baka sakit lempuang, asma enggau ke bukai, nyaga pengerai diri patut nyadi pekara ti keterubah,” ku iya.

Pengawa belanda ba Stop Stigma Run 2019 kemari enda ulih dipejalai beduduk ari gaya hari ti balat besebun.

Taja pia piak pengatur ngatur aktiviti ti lempung ba palan ti sama.

Semua bala penyereta mega diagihka topeng mu enggau nadai bebayar beduduk ari Tikas Pengamah Angin (IPU) manggai 232 naka pukul 7 pagi.

Bala pemenang tiap kategori belanda nyadi mega dipilih nengah pengawa nyabut tiket benasib ngena lumbur baju.