Pekit Tenpin Boling Tebuka Entarabansa Sarawak 2019

KUCHING: Bisi 29 iku raban tim Malaysia nyengkaum jaguh bowling Malaysia Shalin Zulkifli ngulu Pekit Tenpin Boling Tebuka Entarabansa Sarawak 2019.

Presiden Gerempung Tenpin Boling Sarawak Sunny Si Poh Heng madahka pekit serak tu dipasuk urung 400 iku penyereta.

“Bowling tu sebengkah main ti besai sereta pemadu manah di Malaysia.

“Bisi 400 iku penyereta ti ngulu pekit tu datai ari Vanezula, Singapura, Indonesia, Thailand, Hong Kong, China, Taipe, Jipun enggau Brunei sereta tujuh nengeri ari semenanjung,” ku iya.

Sunny bejaku munyi nya ba aum pemberita di Megalanes Sarawak di Emart Batu Kawa ditu, kemari.
Tambah iya, pekit tu benasip bendar laban diatur ba dalam begunan.

ARAPKA MUJUR…Sunny Si Poh Heng (duduk tiga kiba) begambar enggau bala pemain bowling Malaysia.

“Nasib amai pekit tu diatur ba dalam begunan laban penusah besebun enda manah ba luar din,” ku iya.

Nangkan nya pemain biak Kebangsaan Azidi Ameran madahka semua pemain boling ari skuad podium nyentuk ngagai pemain biak dibai sida datai ngulu pekit ke sekali tu.

“Tim Malaysia endang nyukung semua pengawa lumba enggau main ti digaga ba dalam nengeri.

“Tu mega deka nguji naka ni pengering pemain tim kami laban ngelaban pemain ari menua luar.

“Ba pekit kami sigi deka menang aja ngambika terus maju enggau mujur datai ba renggat ti pengabis tinggi,” ku iya.

Kelimpah Shalin, bala pemain bukai baka Sin Li Jane enggau Gillian Lim ti beasal ari Miri mega deka belaban sama enggau penyereta bukai.

Pekit tu diatur tiga hari berunggu bepun 7 ngagai 10 September tu ila.ï