KAPIT: Urung 154 iku nembiak ari tujuh buah Tabika Perpaduan udah dibai raun ngagai Balai Bomba Kapit beserimbai enggau Kimpin Ngitauka Jalur Gemilang sereta Hari Malaysia 2019 Renggat Kapit.

Raban nembiak tu tadi disempulang 16 iku pengajar ari Tabika Perpaduan ditu empu.

Raban nembiak kemaya hari patut bisi pengingin ati nuatka menira tanda sayau lalu taluk ke menua laban sida tu mih dikearap megai menua dudi hari ila, ku Sapit Ketuai Bomba Kapit Erwandi Tugor.

“Kelimpah ari nya, program baka tu ulih ngerapitka agi kaul begulai enggau pangan diri sereta bekunsi penemu ke manah,”

“Ambi ke chunto, program mai nembiak nemuai ngagai Balai Bomba tu udah mujur diatur lalu tu mih tanda kerejasama ke manah entara Opis Penyerakup Bansa enggau Intergrasi Nasional enggau Balai Bomba di Kapit ,”ku iya lebuh dirandau pemberita, apin lama ke udah.

Ba program tu, bala nembiak bisi diberi randau bekaul enggau pengelikun diri lebuh bekena ke api sereta pengawa ke ulih ngemedis kediri.

Pia mega demostrasyen ‘flying fox’ enggau ‘repling’ bisi dibantai ngagai raban nembiak lalu ngintu hari pengada bagi nembiak ke ada bulan September tu.

Sama datai Pemesai ari Opis Penyerakup Bansa enggau Intergrasi Nasional Bagian Kapit, Jendri Mangku.

NGINTU HARI PENGADA: Erwandi (tengah) lalu diuluka Jendri Mangku (kiba) sama belagu Hari Pengada ngagai nembiak ke nyambut pengada bulan tu.