“Nengah latih tu mega, opis menteri bisi bekunsi enggau aku sentang pemar ke bisi ditapi lalu pia mega ba perengka guna ke dikemisi.”

KUCHING: Pengawa Adun Pending Violet Yong ti belatih ba Opis Menteri Dagang Temuai, Seni, Main Asal, Nembiak enggau Lumba bejalai enggau lanchar.

Ku Violet, program latih nya udah muka mata iya kelebih agi ba palan ke enda kala dilawa.

“Naka tu semua bejalai enggau lanchar alai program latih tu udah muka mata aku kelebih agi ba palan ke enda kala dilawa ngelama tu.

“Nengah latih tu mega, opis menteri bisi bekunsi enggau aku sentang pemar ke bisi ditapi lalu pia mega ba perengka guna ke dikemisi,”ku iya.

Violet mansutka jaku nya lebuh dirandau pemberita pengudah ngemujur pengawa nutup Program Kem Aspirasi Pelajar di Kuching, ensna.

Violet Yong

Sepemanjai latih ke berengkah ari 26 April ke udah, Violet udah ngelawa sambil belajar ngagai Biro Konvensyen Sarawak, Muzium Islam Sarawak, Gempung Dagang Temuai Sarawak, Majlis Lumba enggau Main Sarawak, Kompleks Muzium Baru sereta Majlis Asil Pengelandik Jari Sarawak.

“Sehari tu aku deka ngelawa ngagai Pulau Talang-Talang, Taman Negara Tanjong Datu enggau Taman Jelu Siga Matang.

“Pengudah nya, aku mega deka ngelawa sambil belajar ngagai Taman Negara Mulu enggau Gua Niah di Miri kena 21 sereta 24 September tu,’ku iya.

Kena 10 September tu, Violet deka betemu enggau menteri, Datuk Abdul Karim Rahman Hamzah alai seduai deka berandauka program bukai.

Violet deka nembuka program latih ba pengujung bulan September 2019.