KUCHING: Sarawak nyadi chunto nengeri penyerakup lalu seruran diselinting sekeda piak ti kurang mereti nguji mambarka penyerakup ryata pupu bansa ditu.

Kaban Kunsil Negeri (Adun) Padungan, Wong King Wei madah penyerakup ke diasai ba Sarawak ngelama tu patut ditan.

Ku iya, genap nengeri di Malaysia patut nunda Sarawak dalam nempa penyerakup.

“Kitai di Sarawak ulih idup ba baruh siti perabung. Ambika chunto, penyerakup rayat ulih dipeda ba kedai kopi, semua bansa ulih duduk begulai enggau pangan diri,” ku iya.

Iya madah munyi nya lebuh bejadika pengawa nutup Program Neresa Penyerakup Menua Kuching di sebuah kedai besai ditu, ensana.

BEJADI…Wong (tengah) bejadi Program Neresa Penyerakup enggau Kimpin Ngitau Jalur Gemilang di Petra Jaya.

Iya ngarika Sapit Menteri Dagang Dalam Menua enggau Pekara Penguna Chong Chieng Jen.

Kenu ku Wong, diatu bisi ayan sekeda isu ke ulih ngeruga pengelantang nengeri lalu nya patut ditagang.

“Aku andal piak ke bisi kaul enggau pengawa tu ukai semina bsi ngaul politik tang mega ejensi perintah,” ku iya.

Berindik ari nya, Wong ngelalau rayat pupu bansa di nengeri tu patut bebasa sereta ngangkat budi basa taja bebida penatai enggau penemu.

Sama datai Kaban Parlimen Mas Gading Mordi Bimol, Kaban Parlimen Puncak Borneo Willie Mongin enggau Kaban Parlimen Bandar Kuching Dr Kelvin Yii.